19 ءساۋىر 2017, 23:48 1241 0 نۇر وتان انار لەپەسوۆا

قيىندىققا تاپ بولعاندارعا كومەكتەسۋ – ازاماتتىق بورىشىمىز

«نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد «نۇر وتان» پارتيانىڭ وبلىستىق فيليالدارى جانە دەپارتامەنت باسشىلارىمەن كەڭەيتىلگەن وتىرىس وتكىزدى. جيىن 2016 جىلعى جانە 2017 جىلدىڭ ءبىرىنشى توقسانىنداعى جۇمىستاردىڭ قورىتىندىسىنا، سونداي-اق كەلەشەكتەگى قىسقا جانە ۇزاق مەرزىمگە ارنالعان قىزمەتتەردىڭ باسىم باعىتتارىنا ارنالدى.

پارتيا توراعاسىنىڭ ءبىرىنشى ورىنباسارى بارلىق جۇمىستاردىڭ نەگىزگى كورسەتكىشى ايتارلىقتاي جاقسارعانىنا توقتالدى. اتاپ ايتساق، ورتالىقتا دا، جەرگىلىكتى جەرلەردە دە «نۇر وتان» پارتياسىنىڭ بارلىق بولىمشەلەرىنىڭ قىزمەتى جاندانا تۇسكەن. بۇل رەتتە اسىرەسە كونستيتۋتسيالىق رەفورما، پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋى، «نۇرلى جول» ينفراقۇرىلىمدى دامىتۋ باعدارلاماسى، اگرووندىرىس كەشەنىن دامىتۋ مەملەكەتتىك باعدارلاماسى، ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى، سونداي-اق «نۇرلى جەر» تۇرعىن ءۇي قۇرىلىسى باعدارلاماسى سياقتى كۇن تارتىبىندەگى ماڭىزدى ماسەلەلەرگە ەرەكشە كوڭىل ءبولىنىپ كەلەدى.

مۇحتار قۇل-مۇحاممەد رەسۋرستاردى ايقىن ءبولۋ مەن مەنەدجمەنتتىڭ ءتيىمدى ۇلگىسى بار، سونداي-اق بارلىق دەڭگەيدەگى ءىستىڭ ناتيجەلىگىن قاتاڭ باقىلاۋدى قامتاماسىز ەتەتىن پارتيا قىزمەتىنىڭ قىسقا جانە ۇزاق مەرزىمگە ارنالعان جوسپارلاۋىنىڭ جاڭا جۇيەسىن ەنگىزۋدىڭ ارقاسىندا جۇمىس ساپاسىنىڭ ارتىپ، قامتىلۋ اۋقىمىنىڭ كەڭەيە تۇسكەنىن اتاپ ءوتتى.

مەملەكەت باسشىسى ەلىمىزدىڭ الداعى باسىم باعىتتارىن ايقىنداپ بەرگەنىن ايتقان پارتيا توراعاسىنىڭ ءبىرىنشى ورىنباسارى: «بيىل ەلباسىمىز حالىققا ءۇش بىردەي تاريحي باستاماسىن ۇسىندى. ونىڭ ءبىرىنشىسى – ەلىمىزدىڭ ساياسي جۇيەسىن جاڭعىرتۋعا ارنالعان كونستيتۋتسيالىق رەفورما. ەكىنشىسى – مەملەكەت باسشىسىنىڭ قازاقستان ەكونوميكاسىن جاڭا بيىكتەرگە باستايتىن بيىلعى جولداۋى. بۇل ەكى باستاماعا قاتىستى پارتيا تاراپىنان كوپتەگەن جۇمىستار اتقارىلدى. دەگەنمەن، اتالعان جۇمىستار تەك جىلدىڭ ءبىرىنشى توقسانىنا عانا تيەسىلى ەكەنىن ەستەن شىعارماۋىمىز كەرەك. ەلباسىنىڭ جولداۋى تۇتاس جىلدى قامتيتىندىقتان ءبىز بۇل باعىتتاعى جۇمىستاردى قالعان ءۇش توقساندا دا جۇيەلىك كەستەگە سايكەس جالعاستىرۋعا ءتيىسپىز. ەلباسىنىڭ ءۇشىنشى ۇلكەن باستاماسى – جاقىندا عانا جاريالانعان «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى. رۋحانياتىمىزدىڭ سەرپىندى دامۋىنا داڭعىل جول اشىپ بەرگەن ماقالا 2025 جىلعا دەيىنگى كەزەڭدى قامتيتىن ستراتەگيالىق ماڭىزى بار قۇجات. سوندىقتان حالىقتىڭ ءوزى ونداعى باستامالاردىڭ جۇزەگە اسۋىنا تىكەلەي مۇددەلى ەكەندىكتەرىن تانىتۋدا»، – دەي كەلە، ماقالاعا قاتىستى جالپىحالىقتىق تالقىلاۋلارعا بەلسەندى قاتىسىپ، ونى ءتيىمدى جۇزەگە اسىرۋدى تاپسىردى. پارتيا توراعاسىنىڭ ءبىرىنشى ورىنباسارى ەلباسىنىڭ جاڭا تاريحي باستامالارىن ءتۇسىندىرۋ جونىندەگى جۇمىستىڭ ەرەكشە ماڭىزدىلىعىنا توقتالىپ، پارتيا بۇل ءىستىڭ باسى-قاسىندا بولاتىنىنا سەنىم ءبىلدىردى.

سونىمەن قاتار، جيىن بارىسىندا كوكتەمگى سۋ تاسقىنىنان زارداپ شەككەن ايماقتارداعى احۋال تۋرالى دا ايتىلدى. پارتيا توراعاسىنىڭ ءبىرىنشى ورىنباسارى «نۇر وتاننىڭ» وڭىردەگى فيليالدارىنا زارداپ شەككەن تۇرعىندارعا بارىنشا كومەك كورسەتۋدى تاپسىردى.

«ءبىز قاشاندا بىرلىگى بەكەم، ىنتىماعى جاراسقان، كىمگە دە بولماسىن قامقورلىق قولىن سوزۋعا دايىن حالىقپىز. بۇل جولى دا سىزدەردى قيىندىققا تاپ بولعان وتانداستارىمىزدىڭ جاعدايىنا بەي-جاي قارامايدى دەپ سەنەمىن. «نۇر وتان» پارتياسى بۇل قايىرىمدى، ساۋابى مول ىستە كوپكە ۇلگى بولۋى ءتيىس. سۋ تاسقىنىنان زارداپ شەككەندەرگە قول ۇشىن سوزۋ – ءبىزدىڭ ازاماتتىق ابزال بورىشىمىز. سوندىقتان جەرگىلىكتى جەرلەردە وسى باعىتتاعى جۇمىستى جەدەل ءارى جۇيەلى ۇيىمداستىرۋىمىز كەرەك»، – دەدى «نۇر وتان» پارتياسى توراعاسىنىڭ ءبىرىنشى ورىنباسارى.

سوڭعى جاڭالىقتار