20 ءساۋىر 2015, 18:12 2348 0 جاھان ەركەجان جۇماتاي

ۋكراينا حالىقارالىق ۆاليۋتا قورمەن ورتاق جوباسىن ىسكە اسىرماق

ۋكراينانىڭ مەملەكەتتىك بيۋدجەتى ەلدىڭ وڭتۇستىك-شىعىسىنداعى قاقتىعىس كەزىندە دونباسستان سالىق جينالماۋىنا بايلانىستى 2,8 ملرد دوللار جوعالتتى. بۇل تۋرالى ۋكراينا پرەمەر-ءمينيسترى ارسەني ياتسەنيۋك مالىمدەدى دەپ حابارلايدى rosbalt.ru «ءبىز قىس بويى ەلەكترەنەرگيا، گازبەن قامتاماسىز ەتتىك. مۇنىڭ بارلىعى تاعى 1 ملرد دوللاردى قۇرايدى»، -دەپ اتاپ ءوتتى ياتسەنيۋك.

ول ۇكىمەتتىڭ كيەۆتىڭ باقىلاۋىنداعى اۋماقتاردا تىركەلگەن دونباسس تۇرعىندارى ءۇشىن 14 ملرد گريۆەن زەينەتاقى (670 ملن دوللار) تولەگەنىن مالىمدەدى. ونىڭ سوزىنشە، دونەتسك پەن لۋگانسك وبلىستارىندا قاقتىعىسقا دەيىن تۇرعان زەينەتكەرلەر 1,1 ملن ادامنىڭ 900 مىڭىن قۇرايدى. ۋكراينا پرەمەر-ءمينيسترىنىڭ ايتۋىنشا، ۋكراينا بيلىگى ءۇشىن ماڭىزدى تاپسىرمالاردىڭ ءبىرى 23 ملرد دوللار سىرتقى قارىزدى قايتا قۇرىلىمداۋ بويىنشا كەلىسسوزدەر جۇرگىزۋ بولىپ تابىلادى.

«نەسيە بەرۋشىلەر كوپ العىسى كەلەدى، ال ءبىز از تولەگىمىز كەلەدى. ەندى ءبىز وسى ديسكۋسسيانى جالعاستىرامىز، سەبەبى مەن ۋكراينا مەملەكەتىنىڭ ۇلتتىق مۇددەسىن قورعايتىن بولامىن. ءبىز قيىن جاعدايدامىز، بىراق بۇعان قاراماستان حالىقارالىق ۆاليۋتالىق قورمەن اراداعى ورتاق جوبامىزدى ىسكە اسىرامىز، ۋكراينالىق ەكونوميكانىڭ جۇگىن ازايتىپ، دامۋى ءۇشىن العىشارتتار قۇرامىز. ەگەر باعدارلامانى ورىنداساق، جاعداي وڭالماق»، — دەپ ەسەپتەيدى ۋكراينا ۇكىمەتىنىڭ باسشىسى.

ايتا كەتەيىك، حالىقارالىق ۆاليۋتالىق قوردىڭ (حۆق) نەگىزگى تالاپتارىنىڭ ءبىرى — ۋكراينا سىرتقى قارىزدارىنىڭ قايتا قۇرىلىمدالۋى. حۆق مەملەكەتتىك قارىز كولەمى مەن ءجىو اراسىنداعى اراقاتىناس 71%-دان اسپاۋى قاجەت دەپ ەسەپتەيدى. 2014 جىلدىڭ سوڭىندا بۇل كورسەتكىش 73%-دى قۇرادى. حۆق-نىڭ بولجامىنشا، 2015 جىلعا قاراي مەملەكەتتىك قارىز بەن ءجىو اراقاتىناسى 94%-عا دەيىن كوتەرىلۋى مۇمكىن.

سوڭعى جاڭالىقتار