16 قاڭتار 2017, 17:52 2158 0 سپورت اقنيەت وسپانباي

جۇپتىق مانەرلەپ سىرعاناۋ ۋنيۆەرسيادا باعدارلاماسىنا كىرمەدى

جۇپتىق مانەرلەپ سىرعاناۋ قاتىسۋشىلاردىڭ ازدىعىنا بايلانىستى قىسقى ۋنيۆەرسيادا باعدارلاماسىنان الىندى. بۇل تۋرالى 28-ءشى بۇكىلالەمدىك قىسقى ۋنيۆەرسياداعا دايىندالۋ جانە وتكىزۋ جونىندەگى ديرەكتسيا ديرەكتورى نايل نۇروۆ باق-پەن كەزدەسۋدە ءمالىم ەتتى، دەپ حابارلايدى قازاقپارات.
ن.نۇروۆتىڭ ايتۋىنشا، حالىقارالىق ستۋدەنتتەر سپورتى فەدەراتسياسى (FISU) سپورتتىڭ بۇل ءتۇرى بويىنشا سايىسقا قاتىسۋشىلاردى جيناي الماعان. «وكىنىشتىسى، حالىقارالىق ستۋدەنتتەر سپورتى فەدەراتسياسى (FISU) سايىستى ءوز دەڭگەيىندە وتكىزۋ ءۇشىن قاجەتتى قاتىسۋشى سپورتشىلاردى جيناي المادى»، - دەدى اتالعان ديرەكتسيا ديرەكتورى.
دەگەنمەن، ول ۋنيۆەرسياداعا قاتىسۋشى سپورتشىلاردىڭ دەڭگەيى جوعارى ەكەنىن جەتكىزدى. ايتا كەتەيىك، بۇعان دەيىن حالىقارالىق ستۋدەنتتەر سپورتى فەدەراتسياسى تاراپىنان ۋنيۆەرسيادا-2017 باعدارلاماسىنان جۇپتىق مانەرلەپ سىرعاناۋ سايىسىن الىپ تاستاۋ تۋرالى شەشىم قابىلدانعان بولاتىن. ۋنيۆەرسيادا ديرەكتسياسى ديرەكتورىنىڭ ورىنباسارى كاميلا لۇقپانوۆا سايىستىڭ بۇل تۇرىنە بيلەت الىپ قويعانداردىڭ اقشالارى تولىعىمەن قايتارىلاتىنىن جەتكىزگەن ەدى. 

سوڭعى جاڭالىقتار