14 ءساۋىر 2015, 12:45 1928 0 ساياسات اسەل انۋاربەك

سەرىك احمەتوۆتىڭ قاماۋ مەرزىمى تاعى دا ۇزارتىلدى

قازاقستان رەسپۋبليكاسىنىڭ بۇرىنعى پرەمەر-ءمينيسترى سەرىك احمەتوۆ ءۇي قاماۋىندا وتىرعانى بەلگىلى. ەندى قاراعاندى وبلىستىق سوتى سەرىك احمەتوۆتى ءۇي قاماعىنا الۋ مەرزىمىن 2015 جىلدىڭ 18 مامىرىنا دەيىن ۇزارتىپتى.
ەكس-پرەمەردىڭ ءۇي قاماعىندا وتىرۋ مەرزىمىن ۇزارتۋ تۋرالى ءوتىنىش قازىبەك اۋداندىق سوتىندا قارالعان. سونداي-اق، 13 ساۋىردە قاراعاندىداعى قازىبەك اۋداندىق سوتىنىڭ شەشىمى بويىنشا، قاراعاندىنىڭ بۇرىنعى اكىمى مەيرام سماعۇلوۆتىڭ، «قاراعاندى قالاسىنىڭ جەر قاتىناستارى ءبولىمىنىڭ» بۇرىنعى باسشىسى ەرنار دارىبەكوۆتىڭ ءۇي قاماۋىنداعى مەرزىمى 16 مامىرعا دەيىن، ال «قازاقستان ونەركاسىپ كورپوراتسياسى» ديرەكتورىنىڭ بۇرىنعى ورىنباسارى ءالجان اقمولداەۆتىڭ مەرزىمى 20 مامىرعا دەيىن ۇزارتىلدى.
ايتا كەتەيىك، سەرىك احمەتوۆ اسا ءىرى كولەمدە پارە الدى، اسا ءىرى كولەمدە بيۋدجەت قارجىسىن جىمقىردى، لاۋازىمىن اسىرا پايدالاندى جانە كاسىپكەرلىك قىزمەتكە زاڭسىز ارالاستى دەپ ايىپتالعان. سەرىك احمەتوۆ 2014 جىلدىڭ قاراشاسىندا ءۇي قاماعىنا الىنعان بولاتىن. ودان كەيىن سوت شەشىمى بويىنشا قاماۋ مەرزىمى 18 اقپاننان 18 ساۋىرگە دەيىن ۇزارتىلعان ەدى.

سوڭعى جاڭالىقتار