14 ءساۋىر 2015, 09:34 3298 0 جاڭالىقتار اسەل انۋاربەك

قىزىلشا جۇقتىرعاندار كوبەيدى

ەلىمىزدە بيىل قىزىلشا اۋرۋىن جۇقتىرعانداردىڭ قاتارى 13 ەسەگە ارتتى. بۇل تۋرالى قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ءباسپاسوز قىزمەتى حابارلادى.
اعىمداعى جىلدىڭ العاشقى ءۇش ايىندا قىزىلشامەن اۋىرعاندار سانى 1121-گە جەتكەن، ال بۇل كورسەتكىش وتكەن جىلى 84-كە تەڭ بولعان ەكەن. قازاقستاندىقتاردىڭ دەنساۋلىعى ءۇشىن جاۋاپ بەرەتىن دەنساۋلىق ساقتاۋ جانە الەۋمەتتىك دامۋ مينيسترلىگى قىزىلشامەن سىرقاتتانعاندار قاتارىنىڭ ارتۋىنا قىزىلشاعا قارسى ەكپە جۇمىستارىن توقتاتۋ سەبەپ بولدى دەپ وتىر. «سوڭعى 3 جىلدا قىزىلشامەن سىرقاتتانۋشىلىقتىڭ ەپيدەميولوگيالىق جاعدايىنىڭ ءورشۋى بۇكىل الەمدە بايقالدى. ياعني، باتىس ەۋروپادا قىزىلشانىڭ 100 مىڭنان اسا جاعدايى، تمد ەلدەرىندە (رەسەي فەدەراتسياسى، گرۋزيا، قىرعىزستان) 14 مىڭنان اسا جاعداي تىركەلگەن»، – دەپ مالىمدەدى اتالمىش ۆەدومستۆو. ناۋرىز ايىندا استانادا ەۋروپا ايماعىن قىزىلشاعا قارسى يممۋنداۋ ماسەلەسىنە بايلانىستى ۇيىمداستىرىلعان دوڭگەلەك ۇستەلدە سانتياگو جۇقپالى اۋرۋلار ۋنيۆەرسيتەتتىك كلينيكالىق اۋرۋحاناسىنىڭ باسشىسى فەدەريكو مارتيون توررەس قىزىلشانىڭ الدىن الۋ ءۇشىن ۆاكتسينا جاساۋ قاجەتتىگىن ايتقان. بۇل ءادىستى ءتيىمدى پايدالانۋ ءۇشىن قازاقستاننىڭ باس سانيتارى 2015 جىلى 15 قاڭتارداعى قاۋلىسى بويىنشا 15-19 جاس ارالىعىنداعى ادامدارعا قىزىلشاعا قارسى ەكپە جاساۋ تۋرالى شەشىم شىعارعان. بىراق اتالمىش ەكپەدەن كەيىن اۋرۋحاناعا تۇسكەن وقۋشىلار مەن ستۋدەنتتەر قاتارى كۇرت ارتىپ، ۆاكتسيناتسيالاۋ ۋاقىتشا توقتاتىلعان.

سوڭعى جاڭالىقتار