13 ءساۋىر 2015, 10:18 2712 0 ساياسات ءنازيا جويامەرگەنقىزى

كاسىپكەرلەر: اركىمنىڭ داۋىسى ماڭىزدى

الداعى سايلاۋدا ازاماتتار ساياسي تۇرعىدا بەلسەندى بولعانىن قالايتىن سىر بويىنىڭ كاسىپكەرلەرى ارنايى شاراعا بەلسەنە اتسالىسۋدا.

ۇلتتىق كاسىپكەرلەر پالاتاسى ۇيىمداستىرعان «اركىمنىڭ داۋىسى ماڭىزدى. سايلاۋ-2015» اتتى شاراعا سىر وڭىرىندەگى وتاندىق تاۋار وندىرۋشىلەر دە بەلسەنە اتسالىسىپ جاتىر. اتالعان شارانى العاشقىلاردىڭ ءبىرى بولىپ قۇپتاعان «ابزال جانە ك» سەرىكتەستىگىڭ وكىلدەرى ەلىمىزدەگى ساياسي ماڭىزى زور ناۋقانعا ازاماتتاردى وسىلاي شاقىرۋدا.

وتاندىق جانە الەمدىك نارىقتا 20 جىلدان استام ۋاقىتتان بەرى تاجىريبە جيناقتاپ، قازاقستاندىق ءوندىرىستى دامىتۋعا قوماقتى ۇلەس قوسىپ كەلە جاتقان «ابزال ي ك» سەرىكتەستىگى شىعاراتىن ءونىمنىڭ 70 پايىزى ىشكى نارىقتاعى تۇتىنۋشىلىق سۇرانىستى قامتاماسىز ەتۋگە باعىتتالسا، قالعان 30 پايىزى الىس-جاقىن شەت ەلدەرگە ەكسپورتتالادى. شارانى قولداۋ ماقساتىندا ونىمدەردىڭ سىرتىنا «اركىمنىڭ داۋىسى ماڭىزدى!» دەپ جازىلعان ارنايى جاپسىرمالاردى جاپسىرۋدى قولعا العان سەرىكتەستىكتىڭ باسشىسى ابزال ەراليەۆ: «قوعامداعى ءبىزدىڭ ساياسي ءومىرىمىزدىڭ ەڭ ماڭىزدى شاراسى – الداعى مەرزىمىنەن بۇرىن وتكىزىلگەلى جاتقان پرەزيدەنتتىك سايلاۋ. ەل مەن حالىقتىڭ دامۋىنا ىقپال ەتەتىن وسى ناۋقانعا قازاقستان ازاماتتارى تۇگەل قاتىسسىن دەگەن نيەتپەن، «اركىمنىڭ داۋىسى ماڭىزدى» دەگەن شارانى قولداپ وتىرمىز. «حالىق ءبىر جاعادان باس، ءبىر جەڭنەن قول شىعارىپ»، سايلاۋدىڭ ءادىل دە لايىقتى وتۋىنە اتسالىسقانى ءجون»، – دەيدى.

ۇلتتىق كاسىپكەرلەر پالاتاسى باستاعان «اركىمنىڭ داۋىسى ماڭىزدى!» اتتى سايلاۋالدى كەڭ اۋقىمدى اكپاراتتىق ناۋقاننىڭ باستى ماقساتى – ءاربىر ازامات الداعى پرەزيدەنتتىك سايلاۋىنا قاتىسىپ، ءوز ازاماتتىق ۇستانىمىن ءبىلدىرۋدىڭ ماڭىزدىلىعىن جەتكىزۋ. اكتسيا بارىسىندا «اركىمنىڭ داۋىسى ماڭىزدى!» دەگەن جازۋلارى بار جاپسىرمالار بارلىق وتاندىق ونىمگە جاپسىرىلادى. سونىمەن قاتار قازاقستانداعى بارلىق ساۋدا ورتالىقتارىندا، قوعامدىق ورىندار مەن كولىكتەرگە كاسىپكەرلەردىڭ پرەزيدەنتتىك سايلاۋعا قاتىسۋعا شاقىراتىن ەمبلەمالارى بار كۇنتىزبەلەر ىلىنەدى. قر ۇكپ باسقارما توراعاسىنىڭ ورىنباسارى نۇرجان التاەۆ: «قازىر ون مىڭنان استام وسىنداي كۇنتىزبەلەر شىعارىلىپ وتىر. بۇل اكتسيانى وتكىزۋدىڭ سەبەبى كاسىپكەرلەر، ءبىزدىڭ پالاتا مۇشەلەرى جان-جاقتان، وڭىرلەردەن وسىنداي ۇسىنىسپەن شىعارىلادى»، – دەپ مالىمدەدى.

سوڭعى جاڭالىقتار