10 ءساۋىر 2015, 16:37 3139 0 جاھان ەركەجان جۇماتاي

اۋەجايدىڭ استىنان مۇناي تابىلدى

لوندوندا ورنالاسقان «Gatwick» اۋەجايىنىڭ اۋماعىندا مۇناي قورى تابىلدى. وسىعان قاتىستى اقپاراتتى جاريالاعان UK Oil and Gas Investments كومپانياسىنىڭ دەرەگىنە سۇيسەنسەك، تابىلعان مۇناي كولەمى شامامەن 1 شارشى ميلگە 100-158 ملرد باررەلدى قۇرايدى. كومپانيا ساراپشىلارى اۋەجاي ماڭىندا كوپتەگەن نىساندار ورنالاسقاندىقتان، بۇل جەردەن الىناتىن مۇنايدىڭ مولشەرى اسا كوپ بولمايتىندىعىن ايتۋدا. ونىڭ ۇستىنە اۋەجاي اۋماعىنداعى مۇنايدىڭ باسىم بولىگى 1 شاقىرىمعا جۋىق تەرەڭدىكتە جاتقان كورىنەدى. ال UKOG باسشىسى س. ساندەرسون بۇل جاڭالىقتى ۇلىبريتانيادا تابىلعان ەڭ ءىرى ولجاعا بالاپ وتىر. مەكەمە وكىلىنىڭ ايتۋىنشا، بۇل ۇلىبريتانياداعى قۇرلىقتان تابىلعان سوڭعى 30 جىلداعى ەڭ ءىرى «قارا التىن» قورى. جاڭا كەن ورنىنداعى قور سولتۇستىك تەڭىزدە 50 جىلدا وندىرىلگەن مۇنايدان دا كوپ بولىپ شىقتى. كومپانيا باسشىلارى: «جەر استىنداعى «قارا التىننىڭ» 15 پايىزىنا دەيىن شىعارا الامىز، سوندا 2030 جىلعا قاراي ۇلىبريتانياداعى مۇناي سۇرانىسىنىڭ 30 پايىزىن وتەۋىمىز مۇمكىن»، - دەپ وتىر.

سوڭعى جاڭالىقتار