9 ءساۋىر 2015, 15:36 1993 0 جاڭالىقتار اسەل انۋاربەك

"قاراعاندىدا جوعالعاندار" - ۇزدىك ەۋروپالىق دەرەكتى فيلم

قازاقستان مەن يسپانيانىڭ بىرلەسكەن «قاراعاندىدا جوعالعاندار» دەرەكتى تۋىندىسى «California Film Awards» مۇسىنشەسىمەن ماراپاتتالدى. مۇسىنشەنى «Nexos» قاۋىمداستىعىنىڭ پرەزيدەنتى ەنريكە گاسپار قازاقستاننىڭ يسپانياداعى ەلشىسى باقىت دۇيسەنباەۆقا تابىس ەتتى.
«California Film Awards» مۇسىنشەسىن قولىنا العان قازاقستاننىڭ يسپانياداعى ەلشىسى باقىت دۇيسەنباەۆ اتالمىشش ءفيلمنىڭ ءتۇسىرىلىم جۇمىستارىنا ۇلەس قوسقان بارشا قاتىسۋشىلارعا العىسىن ءبىلدىردى. «ءبىزدىڭ بىرلەسكەن ەڭبەگىمىز نازاردان تىس قالعان جوق، "قاراعاندىدا جوعالعاندار" ءفيلمى 2014 جىلدىڭ ەڭ ۇزدىك دەرەكتى ءفيلمى نوميناتسياسىندا جەڭىپ، «California Film Awards» گاۋھار ماراپاتىنا يە بولدى، سونداي-اق دجاكارتاداعى (يندونەزيا) كينوفەستيۆالدە ەڭ ۇزدىك ەۋروپالىق دەرەكتى فيلم اتاندى»، – دەدى باقىت دۇيسەنباەۆ.
قر سىرتقى ىستەر مينيسترلىگىنىڭ قارجىلىق قولداۋىمەن «Nexos» قاۋىمداستىعىنىڭ وكىلدەرى 2014 جىلى كارلاگتا تۇتقىندالعان يسپاندىقتار تۋرالى 50 مينۋتتىق تولىق مەتراجدى دەرەكتى فيلم تۇسىرگەن. اتالمىش ءفيلمنىڭ تۇسىرىلىمىنە 2013 جىلدىڭ قىركۇيەگىندە قر پرەزيدەنتى نۇرسۇلتان نازارباەۆتىڭ يسپانيا ۇكىمەتىنىڭ توراعاسى ماريانو راحويعا كارلاگتا تۇتقىندالعان يسپاندىقتار تۋرالى 152 مۇراعات ىستەرىن بەرۋى سەبەپ بولىپتى. «قاراعاندىدا جوعالعاندار» تۋىندىسىندا وسى كۇنگە دەيىن كوپتەگەن ينسپاندىقتار بىلە بەرمەيتىن مالىمەتتەر مەن يسپاندىقتاردىڭ كارلاگقا جىبەرىلۋ سەبەپتەرى كورسەتىلدى. سونداي-اق، يسپانياداعى ازماتتىق سوعىس، ەكىنشى دۇنيەجۇزىلىك سوعىس كەزىندە ءبىر-بىرىنە قارسى تۇرعان، بىراق ءبىر لاگەرگە جينالعان يسپاندىق رەسپۋبليكالىق پارتيا جانە «كوگىلدىر ديۆيزيا» وكىلدەرىنىڭ تاعدىرى دا سۋرەتتەلگەن.

سوڭعى جاڭالىقتار