24 قاراشا 2016, 23:01 3096 0 قوعام اقنيەت وسپانباي

تۇرعىن ءۇي قۇرىلىس جيناق بانكى جەلىدەگى ۆيدەوعا قاتىستى پىكىر ءبىلدىردى

تۇرعىن ءۇي قۇرىلىس جيناق بانكى ادۆوكاتتىڭ جەلىدە تاراتقان ۆيدەوسىنا قاتىستى پىكىر ءبىلدىردى، دەپ حابارلايدى Tengrinews.kz.

 الەۋمەتتىك جەلىلەردە جانە مەسسەندجەرلەردە زاڭگەردىڭ تۇقجب-نى ايىپتاعان ۆيدەوسى تاراعان بولاتىن. "تۇرعىن ءۇي قۇرىلىس جيناق بانكىنىڭ كەلىسىمشارتى قولىما ءتۇستى، سۇمدىق جاعداي. تۇقجب-دە ازاماتتار ءوز قاراجاتتارىن كوپ جىل بويى جينايدى، سوسىن ولارعا وزدەرى جيناعان قاراجاتتىڭ سوماسىندا 100 پايىز كرەديت بەرەدى. بۇل جاعدايدا بورىشكەر 16,5 ميلليون تەڭگە جيناعان جانە بانك وعان 16,5 ميلليون تەڭگە ۇستىنەن بەردى. ياعني ول 33 ميلليون تەڭگە الادى، بىراق قارىز الۋ تۋرالى كەلىسىمشارت 10 جىلعا 33 ميلليون تەڭگەگە ەسەپتەلەدى. پايىز بورىشكەردىڭ ءوز قاراجاتىنا دا سالىنادى. قارىزدى اي سايىنعى تولەۋ كەستەسىنە قاراساق - ءبىرىنشى ءۇش جىلدا سىياقى جابىلىپ وتىرادى، نەگىزگى قارىزدىڭ ءبىر تيىنى دا جابىلمايدى. بۇل وتە ارام پيعىلدى كەلىسىمشارت، بورىشكەردى قاقپانعا تۇسىرەدى", - دەيدى ۆيدەودا زاڭگەر زويا ءابىلدينا (نارىمباەۆا).

ال بانكتىڭ ءباسپاسوز حاتشىسى ايبار ولجاەۆتىڭ ايتۋىنشا، بانك كليەنتىنىڭ ءوزى جيناعان قاراجاتىنا دا پايىز ەسەپتەلەدى دەگەن مالىمدەمە جاساعان زاڭگەردىڭ مالىمەتى شىندىققا جاناسپايدى.

"كليەنت "تۇرعىن ءۇي قۇرىلىس جيناق بانكىندە" 2008 جىلدىڭ 17 ناۋرىزىندا ەسەپ اشقان، ال 2008 جىلدىڭ 21 ساۋىرىندە ارالىق تۇرعىن ءۇي قارىزى بويىنشا كرەديت بەرىلىپ قويعان. ءتۇسىندىرىپ ايتار بولساق، كليەنت بانكتە قاراجات جيناعان جوق، سەبەبى كرەديت بەرىلگەن كەزدە ونىڭ دەپوزيتىنىڭ اشىلعانىنا ءبىر عانا اي بولعان. (...) كليەنت جىلدىق مولشەرلەمەسى 5 پايىزبەن بەرىلەتىن تۇرعىن ءۇي قارىزىن الۋ بويىنشا شارتتى ورىنداماعانىن باستاپقىدا-اق بىلگەن. ياعني جيناقتاۋ مەرزىمى مەن تولەمدەردىڭ رەتتىلىگى ساقتالماعان. وسىعان بايلانىستى كليەنت "جەڭىل" باعدارلاماسى بويىنشا ارالىق قارىز الۋعا نيەت ءبىلدىردى", - دەلىنگەن رەسمي ساۋالعا بەرىلگەن جاۋاپتا.

تۇقجب مالىمەتىنشە، ارالىق تۇرعىن ءۇي قارىزى بىرنەشە جىل بويى قاراجات جيناۋعا مۇمكىندىگى جوق، بىراق قاجەتتى سومانىڭ 50 پايىز قاراجاتى بارلارعا بەرىلەدى. بۇل 50 پايىز قاراجاتتى بورىشكەر جيناق ەسەپشوتىنا سالادى، بۇل قاراجات كەپىل بولىپ سانالادى جانە كرەديت بەرىلگەندە ەسەپكە الىنبايدى. مۇنىڭ ورنىنا بانك 7,5-تەن 8,5 پايىزعا دەيىنگى مولشەرلەمەدە 100 پايىز سومادا قارىز بەرەدى. بانكتىڭ سىياقىسى بەرىلگەن 100 پايىز قاراجاتقا ەسەپتەلەدى. ال سالىمشى جيناپ، دەپوزيتكە سالعان 50 پايىز سوما سول ەسەپشوتتا قالادى، ءسويتىپ، ءۇش جىل بويىندا وعان بانكتىڭ سىياقىسى مەن مەملەكەتتىڭ سىياقىسى قوسىلادى. ءۇش جىل وتكەننەن كەيىن دەپوزيتتە جاتقان 50 پايىز جيناق اقشا ارالىق قارىزدى جابۋعا جۇمسالادى، ال كليەنت تۇرعىن ءۇي قارىزىنا وتەدى، ونىڭ جىلدىق مولشەرلەمەسى 3,5-5 پايىز ارالىعىندا.

"كليەنتكە قاتىستى ايتار بولساق، بورىشكەر 2008 جىلدىڭ ساۋىرىندە 33 290 000 تەڭگە كولەمىندە قارىز الىپ، سول جىلدىڭ شىلدەسىنەن باستاپ كرەديت بويىنشا تولەم جاساماي قويدى. بانك سوتقا جۇگىنۋدىڭ الدىندا رەسترۋكتۋريزاتسيا ۇسىندى، بىراق بورىشكەر بۇدان باس تارتتى. بانك 2009 جىلدىڭ 5 مامىرىندا سوتقا ارىز ءتۇسىردى، ءسويتىپ، 2009 جىلدىڭ 14 شىلدەسىنجە سوتتىڭ شەشىمىمەن "قازاقستاننىڭ تۇرعىن ءۇي قۇرىلىس جيناق بانكى" اق-نىڭ بورىشكەردەر قارىزدى ءوندىرۋ تۋرالى شاعىم تالابى قاناعاتتاندىرىلدى", - دەپ حابارلادى بانكتەگىلەر.

 

سوڭعى جاڭالىقتار