16 قاراشا 2016, 20:05 2649 0 قوعام دينارا مىڭجاسارقىزى

«اتامەكەن» ۇكپ جاڭا سالىق كودەكسىن ازىرلەمەك

«اتامەكەن» ۇلتتىق كاسىپكەرلەر پالاتاسى جاڭا سالىق كودەكسى جوباسىن ازىرلەۋ جانە ونى كەڭىنەن تالقىلاۋ باعىتىندا جۇمىسىن باستادى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا ۇكپ باسقارما توراعاسى ابىلاي مىرزاحمەتوۆ ءمالىم ەتتى.

«قوسىمشا قۇن سالىعىنىڭ شەكتى مولشەرىن تومەندەتۋ ماسەلەسى قوعامدا قىزۋ تالقىعا تۇسكەنى بەلگىلى. الداعى ۋاقىتتا شاعىن جانە ورتا بيزنەسكە ارتىلاتىن قوسىمشا سالىق جۇكتەمەسىنىڭ ءوسۋ قاۋپى جونىندە قازاقستاننىڭ تانىمال ەكونوميستەر توبى ورتاق پىكىرلەرىن دە جاريالاعان بولاتىن. سالىق زاڭناماسىنىڭ قيىنداي ءتۇسۋى مەن ونى ورىنداۋدا بيزنەسكە سالىناتىن الىمداردىڭ ءوسۋى سالدارىنان ەڭبەكاقى قورىندا دا جۇكتەمەنىڭ ارتۋىنا قاتىستى تۋىندايتىن سۇراقتار ءوز الدىنا بولەك ماسەلە»، – دەدى ا. مىرزاحمەتوۆ.

باسقارما توراعاسى كاسىپكەرلەردىڭ مۇددەلەرىن ەسكەرە وتىرىپ، جاڭا سالىق كودەكسىن ازىرلەۋ تۋرالى باستاما كوتەرىلگەنىن جەتكىزدى.

«ۇلتتىق كاسىپكەرلەر پالاتاسى اتالعان سۇراقتىڭ كاسىپكەرلەر ءۇشىن ماڭىزدىلىعىن ەسكەرە وتىرىپ، ەكونوميستەردىڭ پىكىرىنە قولداۋ تانىتۋدا. بيزنەستىڭ مۇددەسىن ەسەپكە الا وتىرىپ، جاڭا سالىق كودەكسىن 2017 جىلدىڭ 1 مامىرىنا دەيىن ازىرلەۋ تۋرالى باستاما كوتەردى. جاڭا سالىق كودەكسىنىڭ باستى ماقساتى – شاعىن جانە ورتا بيزنەسكە سالىناتىن سالىق جۇكتەمەسىن ازايتۋ جانە سالىقتىق اكىمشىلىكتى وڭتايلاندىرۋ. بۇل ىسكەرلىك بەلسەندىلىكتى ارتتىرۋعا جانە بيزنەستى «كولەڭكەدەن» شىعارۋعا ىنتالاندىرادى»، – دەدى ول.

سوڭعى جاڭالىقتار