7 ءساۋىر 2015, 14:54 3325 0 جاڭالىقتار اسەل انۋاربەك

نەسيەسى بار ازاماتتار اسكەر قاتارىنا قابىلدانبايدى

اسكەر قاتارىنا قابىلداۋ تالاپتارى بيىلعى جىلى ءبىراز كۇشەيدى. كوكتەمگى اسكەرگە شاقىرۋ ناۋقانى بارىسىندا ازاماتتىق بورىشىن وتەيمىن دەگەن ازاماتتاردىڭ قوماقتى نەسيەسى بولماۋى ءتيىس ەكەن.
بيىلعى جىلى اسكەر قاتارىنا قابىلداناتىن جاس ساربازدار ەلەكتروندى تۇردە 126 سۇراقتان تۇراتىن پسيحولوگيالىق تەست تاپسىرادى. ال شەكارا قىزمەتىنە جول تارتاتىندار «شىندىق دەتەكتورىنان» وتەدى. سوڭعى ۋاقىتتا اسكەردە ءوز-وزىنە قول جۇمسايتىن ساربازداردىڭ كوبەيىپ جاتقاندىعىن ەسكەرىپ، الدىن الا جاس ساربازداردىڭ جۇيكە جۇيەسى دە تەكسەرۋدەن وتكىزىلەدى. ءساۋىر ايىنىڭ العاشقى كۇنىنەن باستاپ ءجۇرىپ جاتقان تەكسەرىس بارىسىندا پسيحولوگتىڭ سىنىنان سۇرىنگەن ازاماتتار سانى بىرازعا جەتكەن. ءبىر عانا الماتى قالاسىنىڭ وزىنەن بيىل 23 مىڭ ەر ازامات اسكەر قاتارىنا شاقىرىلعان. ونىڭ تەك 5 مىڭى عانا مەديتسينالىق تەكسەرۋدەن وتۋگە جولداما العان. ال بارلىق تەكسەرىستەن وتكەن جاس ساربازدار سانى 1 مىڭعا ازەر جەتىپ وتىر. ەر ازاماتتاردىڭ كوپشىلىگىندە جۇرەك جانە جۇيكە اۋرۋلارىنىڭ بەلگىسى بايقالعاندىقتان، ولار دارىگەرلەردىڭ تەكسەرىسىنەن وتە الماعان. مامانداردىڭ تەكسەرۋىنەن سۇرىنبەي وتكەندەر ەندى وتان الدىنداعى ازاماتتىق بورىشىن وتەۋ ءۇشىن اسكەرگە اتتانادى. ءبىر قۋانتارلىعى، بيىل اسكەرگە وزدەرى سۇرانىپ، تالپىنىس بىلدىرگەندەر سانى ەداۋىر كوبەيىپتى. بۇگىنگى قازاق جاۋىنگەرلەرىنىڭ 60 پايىزى جوعارى ءبىلىمدى ازاماتتار.
ەستەرىڭىزگە سالا كەتەيىك، بيىلعى جىلدان باستاپ اسكەرگە بارۋدان باس تارتقان ازاماتتار جاۋاپقا تارتىلادى. قىلمىستىق كودەكستىڭ 387 بابى بويىنشا، اسكەردەن قاشقاندار 1 جىلعا باس بوستاندىعىنان ايىرىلادى نەمەسە 1000 ايلىق ەسەپتىك كورسەتكىش كولەمىندە ايىپپۇل تولەيدى.

سوڭعى جاڭالىقتار