2 قاراشا 2016, 17:22 1459 0 قوعام دينارا مىڭجاسارقىزى

ەلباسى قايرات كەلىمبەتوۆتى قابىلدادى

مەملەكەت باسشىسى نۇرسۇلتان نازارباەۆ "استانا" حالىقارالىق قارجى ورتالىعىنىڭ باسقارۋشىسى قايرات كەلىمبەتوۆتى قابىلدادى، - دەپ حابارلايدى اقوردا.

كەزدەسۋدە قايرات كەلىمبەتوۆ ەلباسىعا رەسپۋبليكادا قازاقستان پرەزيدەنتىنىڭ باستاماسىمەن وزىق الەمدىك تاجىريبە نەگىزىندە قۇرىلعان، قارجىلىق قىزمەتتەر كورسەتەتىن جەتەكشى ورتالىق قالىپتاستىرۋ جونىندەگى شارالار جيىنتىعىنىڭ ىسكە اسىرىلۋى تۋرالى باياندادى.

نۇرسۇلتان نازارباەۆ "استانا" حالىقارالىق قارجى ورتالىعى (احقو) ستراتەگياسىن جۇزەگە اسىرۋ ەل ەكونوميكاسىنا ەلەۋلى قارجى رەسۋرسىن تارتۋعا مۇمكىندىك بەرەتىنىن اتاپ ءوتتى.

"استانا" حالىقارالىق قارجى ورتالىعى قازاقستاننىڭ قارجى ينفراقۇرىلىمىنىڭ وزەگىنە اينالىپ، ورتالىق ازيا مەن ەۋرازيالىق ەكونوميكالىق وداقتىڭ قارجى حابى ءرولىن اتقارۋعا ءتيىس", - دەدى ەلباسى.

قايرات كەلىمبەتوۆ بىلتىرعى جەلتوقسان ايىندا "استانا" حالىقارالىق قارجى ورتالىعى تۋرالى كونستيتۋتسيالىق زاڭعا قول قويىلۋى پوستكەڭەستىك كەڭىستىكتە تۇڭعىش رەت اعىلشىن قۇقىعى قاعيداتى نەگىزىندە جۇمىس جۇرگىزە باستاۋعا مۇمكىندىك بەرگەنىن ايتتى.

قارجى ورتالىعىنىڭ باسقارۋشىسى قازاقستان پرەزيدەنتىن احقو-نى قۇرۋ تۋرالى يدەيانىڭ حالىقارالىق ينۆەستيتسيالىق ورتا وكىلدەرى تاراپىنان وتە جوعارى باعاعا يە بولىپ وتىرعانى تۋرالى حاباردار ەتتى.

"مەملەكەت باسشىسىنىڭ شەتەلگە ساپارلارى بارىسىندا قول جەتكىزىلگەن ۋاعدالاستىقتار ورتالىقتىڭ جۇمىسىنا ەرەكشە سەرپىن بەرىپ وتىر. اتاپ ايتقاندا، "10 تريلليون" كلۋبىنىڭ وكىلدەرىمەن وتكەن كەزدەسۋدىڭ تابىستى بولعانى اتاپ ءوتىلدى", - دەدى قايرات كەلىمبەتوۆ.

مەملەكەت باسشىسى قارجى قىزمەتتەرى نارىعىنىڭ الەمدىك كوشباسشىلارىمەن ىنتىماقتاستىق ورناتۋدىڭ جانە احقو قىزمەتكەرلەرىنىڭ جوعارى كاسىبي قۇرامىن جاساقتاۋ باعىتىندا جۇرگىزىلەتىن جۇمىستىڭ ماڭىزدىلىعىنا باسا نازار اۋداردى. 

سوڭعى جاڭالىقتار