6 ءساۋىر 2015, 11:59 3068 0 الەۋمەت اسەل انۋاربەك

باقىلاۋداعى 200 ءتۇرلى ءدارى-دارمەكتىڭ باعاسى كوتەرىلمەيدى

استانا قالاسىندا قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا قازاقستاننىڭ كاسىبي فارماتسەۆتيكالىق قاۋىمداستىقتارىنىڭ باسشىلارىمەن كەزدەستى. كەزدەسۋ بارىسىندا 200 ءتۇرلى دارىلىك زاتتار مەن مەديتسينالىق ماقساتتاعى بۇيىمداردىڭ باعاسىن ۇستاپ تۇرۋ تۋرالى مەموراندۋمعا قول قويىلدى.

اتالمىش كەلىسىمدى فارماتسەۆتيكالىق قىزمەتتى قولداۋ جانە دامىتۋ، «قازاقستاننىڭ فارممەديندۋسترياسى»، «قر حالىقارالىق فارماتسەۆتيكالىق وندىرۋشىلەرى»، «قر فارماتسەۆتيكالىق ءونىم ديستريبيۋتورلارى» قاۋىمداستىقتارى قولدادى. مەموراندۋمعا قول قويۋداعى ماقسات – حالىقتىڭ الەۋمەتتىك جاعىنان قاۋقارسىز توپتارىن قولداۋ. «بۇل قۇجاتقا قول قويۋ ارقىلى ادامدارعا ۇلكەن قولداۋ جاسالۋدا. وسى ورايدا قاۋىمداستىقتاردىڭ وزدەرىنە جۇكتەپ وتىرعان الەۋمەتتىك جاۋاپكەرشىلىگى ءۇشىن العىسىمدى بىلدىرگىم كەلەدى»، – دەدى مەموراندۋمعا قول قويعان دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا.

ەلىمىزدەگى وتاندىق جانە حالىقارالىق دارىلىك زاتتاردى، مەديتسينالىق بۇيىمداردى وندىرۋشىلەر، ديستريبيۋتورلار جانە ساۋدا وكىلدەرى حالىق ءجيى تۇتىناتىن دارىلىك زاتتار مەن مەديتسينالىق ماقساتتاعى بۇيىمداردىڭ قۇنىن ۇستاپ تۇرۋ تۋرالى جاۋاپكەرشىلىكتى ءوز مويىندارىنا الدى. باعاسى كوتەرىلمەيتىن دارىلەر مەن مەديتسينالىق زاتتاردىڭ قاتارىندا قابىنۋعا قارسى، اۋىرۋدى باساتىن، دەنە قىزۋىن تۇسىرەتىن دارىلىك پرەپاراتتار، انتيبيوتيكتەردىڭ كەيبىر تۇرلەرى، شپريتستەر جانە جارا تاڭاتىن داكەلەر بار. اتالعان دارىلەردىڭ تىزبەسى ءاربىر ءدارىحانادا ءىلىنىپ تۇراتىن بولادى. ايتا كەتەيىك، قۇجاتتا كورسەتىلگەن دارىلەردىڭ 70-ءى شەتەلدىك پرەپاراتتار ەكەن.

ال مەموراندۋمعا ساي ءدارى-دارمەكتەردىڭ قۇنىن بەلگىلەنگەن باعادان اسىرعاندار جاۋاپكەرشىلىككە تارتىلادى. «بۇل تۇرعىدا ايىپپۇل از ەمەس. مينيسترلىكتىڭ ءاربىر قالادا فارماتسەۆتيكالىق ينسپەكتسياسى بار. سوندىقتان ءتيىستى قاداعالاۋ نازاردان تىس قالمايدى»، – دەپ اتاپ ءوتتى «قازاقستاننىڭ فارممەديندۋسترياسى» قاۋىمداستىعىنىڭ پرەزيدەنتى سەرىك سۇلتانوۆ.

سوڭعى جاڭالىقتار