5 قازان 2016, 19:44 1482 0 سىرتقى ساياسات دينارا مىڭجاسارقىزى

توقاەۆ بريتان پارلامەنتشىلەرىمەن كەزدەستى

سەنات توراعاسى قاسىم-جومارت توقاەۆ ۇلىبريتانيا جانە سولتۇستىك يرلانديا بىرىككەن كورولدىگى پارلامەنتىنىڭ قازاقستانمەن ىنتىماقتاستىق جونىندەگى بۇكىلپارتيالىق توپتىڭ دەلەگاتسياسىمەن كەزدەستى.

قاۋىمدار پالاتاسىنىڭ دەپۋتاتى گيزەل ستيۋارت باسقاراتىن بۇل توپقا پارلامەنتتىڭ قوس پالاتاسىنداعى ءتۇرلى ساياسي پارتيالاردىڭ مۇشەلەرى، سونداي-اق تاۋەلسىز دەپۋتاتتار ەنەدى.

ق.توقاەۆ ەكى ەلدىڭ جان-جاقتى ءوزارا ءىس-قيمىلىن نىعايتۋعا ىقپال ەتەتىن بريتانيا پارلامەنتىندەگى دەپۋتاتتىق توپتىڭ قىزمەتىن قولدايتىنى جايىندا ايتتى.

مەيمانداردىڭ ءوتىنىشى بويىنشا توراعا پرەزيدەنت نۇرسۇلتان نازارباەۆ باستاعان ينستيتۋتتىق رەفورمالاردى ىسكە اسىرۋ بارىسى، سونداي-اق ەلىمىزدىڭ ساياسي جۇيەسىندەگى سەناتتىڭ ءرولى تۋرالى اڭگىمەلەدى. توراعا رەفورمالار كاسىبي جانە دەربەس مەملەكەتتىك اپپاراتتى قالىپتاستىرۋعا، زاڭ ۇستەمدىگىن قامتاماسىز ەتۋگە، يندۋستريالاندىرۋ مەن ەكونوميكالىق وركەندەۋگە، ۇلت تۇتاستىعىن نىعايتۋعا، سونداي-اق ترانسپارەنتتى جانە ەسەپ بەرەتىن مەملەكەتتى دامىتۋعا باعىتتالعانى تۋرالى حاباردار ەتتى.

ەكىجاقتى ىنتىماقتاستىقتىڭ باسىمدىقتارى تۋرالى ايتقاندا ق.توقاەۆ قازاقستان پرەزيدەنتىنىڭ وتكەن جىلعى قاراشادا لوندونعا رەسمي ساپارى بارىسىندا قول جەتكەن ۋاعدالاستىقتاردى ىسكە اسىرۋدىڭ ماڭىزدىلىعىن اتاپ ءوتتى.

سەنات باسشىسى ۇلىبريتانيانىڭ ەۋروپالىق وداقتان شىعۋ ۇدەرىسى تۋرالى ءوز پىكىرىن ءبىلدىردى. «ەۋرووداق ءبىز ءۇشىن - ءىرى ساۋدا-ەكونوميكالىق ارىپتەس، ال ۇلىبريتانيا قازاقستان ەكونوميكاسىنىڭ نەگىزگى ينۆەستورلارىنىڭ ءبىرى. ءبىز لوندون مەن بريۋسسەل تەزىرەك وڭتايلى شەشىمگە كەلۋىنە جانە ساۋدا-ەكونوميكالىق دامۋدىڭ مەيلىنشە قولايلى شارتتارىن دايارلاۋىنا مۇددەلىمىز»، - دەپ اتاپ ءوتتى ق.توقاەۆ.

بريتان پارلامەنتىنىڭ دەپۋتاتتارى قازاقستاننىڭ قازىرگى زامانداعى دامۋىنا، پرەزيدەنت ن.نازارباەۆتىڭ رەفورمالار باعدارلاماسىنا جانە قازاقستاننىڭ سىرتقى ساياسي باسىمدىقتارىنا وڭ پىكىر ءبىلدىردى، سونداي-اق قازاقستان مەن بريتانيانىڭ پارلامەنتتىك ۇنقاتىسۋىن جالعاستىرۋدىڭ ماڭىزدىلىعىن اتاپ ءوتتى.

 

سوڭعى جاڭالىقتار