2 ءساۋىر 2015, 15:56 2313 0 جاڭالىقتار اسەل انۋاربەك

ۇلتتىق كيىم كۇنىن مينيستر دە قولدايدى

تاريحشى ارمان نۇرمۇحانبەتوۆ ەلىمىزدە ۇلتتىق كيىم كۇنىن بەلگىلەۋ تۋرالى ۇسىنىس بىلدىرگەن بولاتىن. ارمان نۇرمۇحانبەتوۆتىڭ بۇل يدەياسىن قر مادەنيەت جانە سپورت ءمينيسترى ارىستانبەك مۇحامەديۇلى دا قولدادى.
ءوز كەزەگىندە مادەنيەت جانە سپورت ءمينيسترى تەك قازاقتىڭ ۇلتتىق كيىم كۇنىن عانا ەمەس، قازاقستاندى مەكەن ەتكەن بارلىق ۇلت وكىلدەرىنىڭ كيىم كۇنىن ەنگىزۋدى ۇسىندى. ەڭ الدىمەن ناۋرىز مەيرامىن كەڭ كولەمدە تويلاۋ قاجەتتىگىنە توقتالعان ارىسيانبەك مۇحامەديۇلى: «بىزدە ناۋرىز مەيرامىن تويلاۋ بويىنشا كونتسەپتسيا جاسالدى. ادامدار كيىز ۇيگە بارىپ، تاماق ءىشىپ قانا قويماۋ كەرەك. ءبىرىنشى كەزەكتە، بۇل مەيرام بالالارعا ارنالۋى ءتيىس. ءبىز جاڭا جىلدا نە ىستەيمىز؟ ءبارىمىز بالالارعا سىيلىق اپەرەمىز، شىرشا ارلەيمىز. مەنىڭشە، ناۋرىزدى بالالاردىڭ مەيرامى ەتپەسەك، ونى ساقتاپ قالۋ قيىن. ۇلتتىق كيىمدى كيۋگە ۇيالاتىنداي جاعدايعا جەتتىك»، – دەدى. ال ۇلتتىق كيىمدى وسى مەرەكەدە كيۋ كەرەك دەپ سانايدى. «ناۋرىز كۇنى ءاربىر قازاقستاندىق كوشەگە ۇلتتىق كيىممەن شىقسا. مىندەتتى تۇردە ساۋكەلە مەن ۇلكەن شاپان كيۋ ەمەس، ءجاي عانا ەلەمەنتتەرىمەن كيسە. قازاقتار ءوز كيىمىمەن، ورىستار ءوز كيىمدەرىمەن، قالعان حالىقتار دا ءوز ۇلتتىق كيىمدەرىن كيسە. بۇل ارقىلى مەيرامعا ءسان بەرەمىز. بۇل كۇن كۇنتىزبەدە پرەزيدەنتتىڭ جارلىعىمەن نەمەسە ۇكىمەتتىڭ قاۋلىسىمەن پايدا بولماۋى كەرەك، قوعامدىق باستاما بولۋى كەرەك»، – دەيدى ارىستانبەك مۇحامەديۇلى.

سوڭعى جاڭالىقتار