2 ءساۋىر 2015, 16:07 2641 0 جاڭالىقتار اسەل انۋاربەك

رەسەيدە كەمە اپاتقا ۇشىرادى

رەسەيدىڭ وحوت تەڭىزىندە «دالني ۆوستوك» كەمەسى اپاتقا ۇشىراپ، 54 ادام قازا تاپتى. ورىن العان قايعىلى وقيعاعا بايلانىستى مەملەكەت باسشىسى نۇرسۇلتان نازارباەۆ رەسەي پرەزيدەنتى ۆلاديمير پۋتينگە كوڭىل ايتۋ جەدەلحاتىن جولدادى. بۇل تۋرالى اقوردانىڭ رەسمي سايتىندا جاريالاندى.
قايعىلى وقيعا ماگاداننان شامامەن 300 شاقىرىم جەردە ورىن العان. كەمەنىڭ بورتىندا بارلىعى 132 ادام بولعان، ونىڭ 78-ءى رەسەيلىك، قالعان 54-ءى شەتەلدىك ازامات. ەكيپاجدا رەسەيلىكتەردەن بولەك بيرما، ۆانۋاتۋ، لاتۆيا جانە ۋكراينا سىندى مەملەكەتتەردىڭ ازاماتتارى دا بولعان ەكەن. اپاتقا ۇشىراعان كەمەدەن قازىرگە دەيىن 63 ادام قۇتقارىلدى. ال قالعان 15-ءىنىڭ تاعدىرى ءالى بە بەلگىسىز بولىپ تۇر. قازىر اپات ايماعىندا ىزدەۋ-قۇتقارۋ جۇمىستارى جۇرگىزىلۋدە. ىزدەۋ-قۇتقارۋ ءىس قيمىلدارىنا 800-گە جۋىق قۇتقارۋشى، تىكۇشاق جانە 26 كەمە جۇمىلدىرىلعان.
كەمەنىڭ اپاتقا ۇشىراۋىنا بايلانىستى ءتۇرلى بولجامدار دا جاسالۋدا. العاشقى بولجام بويىنشا، بالىق اۋلايتىن كەمە سۋ بەتىندە قالقىپ تۇرعان مۇزعا سوقتىعىسقان بولۋى مۇمكىن. ال تاعى ءبىر بولجامعا سۇيەنسەك، اپاتتىڭ ورىن الۋىنا سالماقتىڭ شەكتەن تىس ارتىق بولۋى مەن كۇشتى جەل اسەر ەتۋى ىقتيمال. كەمە باتار الدىندا دابىل بەلگىسىن بەرىپ ۇلگەرمەگەن. قازىر كەمەگە يەلىك ەتەتىن كومپانيا قازا تاپقاندار مەن زارداپ شەككەن جانداردىڭ وتباسىلارىنا كومەك كورسەتەتىنىن ايتتى.
وسى قايعىلى وقيعاعا بايلانىستى جولداعان ەلباسىنىڭ جەدەلحاتىندا رەسەي پرەزيدەنتىنە جانە قازا بولعانداردىڭ وتباسىلارىنا كوڭىل ايتىپ، زارداپ شەككەندەردىڭ تەزىرەك ساۋىعۋىنا تىلەكتەستىك ءبىلدىردى.

سوڭعى جاڭالىقتار