2 ءساۋىر 2015, 16:08 1894 0 جاڭالىقتار اسەل انۋاربەك

قىزىلشاعا قارسى ەكپە الماستىرىلادى

اقپان ايىنىڭ باسىنان بەرى قازاقستاندىقتاردى شۋلاتقان قىزىلشاعا قارسى ەكپە ەندى جارامسىز بولىپ تانىلدى. شىعىس قازاقستان وبلىسى دەنساۋلىق ساقتاۋ باسقارماسىنىڭ توراعاسى ۆاديم وۆسياننيكوۆ وسىنداي مالىمدەمە جاسادى.
ەستەرىڭىزدە بولسا، قىزىلشاعا قارسى ەكپە ەلىمىزدەگى 15 پەن 19 جاس ارالىعىنداعى جاسوسپىرىمدەرگە جاسالعان. ەكپەدەن كەيىن دەنساۋلىعى ناشارلاپ اۋرۋحاناعا تۇسكەن بالالاردىڭ قاتارى كۇرت ارتقان بولاتىن. سوندىقتان دا، دەنساۋلىق ساقتاۋ مينيسترلىگى تەكسەرۋ جۇمىستارىن باستادى. ەلىمىزدىڭ باس سانيتارى جانداربەك بەكشين مىرزانىڭ قاۋلىسى بويىنشا، قىزىلشاعا قارسى ەكپەنى سالۋ 4 مامىرعا دەيىن توقتاتىلعان ەدى. ەندى اتالمىش ۆاكتسينانى شىعىس قازاقستان وبلىسى دەنساۋلىق ساقتاۋ باسقارماسى جارامسىز دەپ تانىپ وتىر.
وبلىستىق دەنساۋلىق ساقتاۋ باسقارماسىنىڭ دەرەكتەرىنە سۇيەنسەك، ۇستىمىزدەگى جىلى وبلىس بويىنشا 164 تۇرعىن قىزىلشا اۋرۋىمەن تىركەلىپتى. ال وتكەن جىلى قىزىلشامەن ناۋقاستانعاندار قاتارى بار-جوعى 83 ادام بولعان. «ەشقانداي دا ەپيدەميا جوق. بۇل ازداعان كورسەتكىشتەر عانا. پرەپاراتتار ءالى دە 60 مىڭ پاتسيەنتكە جەتەدى. بىراق بۇل ەكپەلەردىڭ پارتياسى
جارامسىز بولىپ تانىلعاندىقتان الماستىرىلاتىن بولادى»، – دەپ اتاپ ءوتتى شىعىس قازاقستان وبلىستىق دەنساۋلىق ساقتاۋ باسقارماسىنىڭ توراعاسى ۆاديم وۆسياننيكوۆ.

سوڭعى جاڭالىقتار