12 تامىز 2016, 14:33 2544 0 سپورت دينارا مىڭجاسارقىزى

دميتري بالاندين ۋنيۆەرسيادا-2017 الاۋىن الىپ جۇرەدى

وليمپيادا چەمپيونى دميتري بالاندين ۋنيۆەرسيادا-2017 الاۋ ەستافەتاسىنىڭ العاشقى قاتىسۋشىلارىنىڭ ءبىرى بولماق. بۇل تۋرالى 2017 جىلى الماتىدا وتەتىن 28-ءشى بۇكىلالەمدىك قىسقى ۋنيۆەرسيادانىڭ الاۋ ەستافەتاسى ديرەكتسياسىنىڭ مەنەدجەرى كيريلل پيارتەل حابارلادى. «وليمپيادا قورىتىندىسى جاريالانعاننان كەيىن-اق، ۇيىمداستىرۋشىلار كوميتەتى رەسمي ىرىكتەۋ بايقاۋىنىڭ باستالۋىن كۇتپەستەن، ۋنيۆەرسيادا الاۋىن الىپ ءجۇرۋ مارتەبەسىن دميتري بالاندينگە بەرۋ تۋرالى شەشىم قابىلدادى. مۇندا ونىڭ الماتىدا تۋىپ-وسكەنى، الماتىداعى جوو-دا ءبىلىم الىپ جاتقانى دا ەسكەرىلدى»، - دەپ ءتۇسىندىردى ديرەكتسيا.

الاۋ ەستافەتاسىنا بارشا قازاقستاننان 1 000 ادام قاتىسادى. «الاۋ ۇستاۋشىلاردىڭ 75% ستۋدەنتتەر بولماق. ستۋدەنتتەر اراسىنان سپورت، عىلىم، مادەنيەت سىندى ءوزىن جان-جاقتى قىرىنان كورسەتىپ جۇرگەن ۇزدىك ستۋدەنتتەر تاڭداپ الىنادى»، - دەدى ك.پيارتەل.

2017 جىلى الماتىدا وتەتىن 28-ءشى بۇكىلالەمدىك قىسقى ۋنيۆەرسيادانىڭ الاۋ ەستافەتاسىنا قاتىسۋشىلاردى رەسمي ىرىكتەۋ بايقاۋى 2016 جىلدىڭ 1 قىركۇيەگىندە باستالادى جانە 16 جەلتوقسان كۇنى الاۋ ۇستاۋشىلاردىڭ قورىتىندى ءتىزىمى جاريالانادى.

سوڭعى جاڭالىقتار