1 قازان, 19:34 36984 0 دەنساۋلىق انار لەپەسوۆا

مينيستر قازاقستاندىقتارعا قاتاڭ قارانتين قايتا ەنگىزىلۋى مۇمكىن ەكەنىن ەسكەرتتى

قاۋىپسىزدىك تالاپتارى ساقتالماسا، الداعى ۋاقىتتا كارانتيندىك شارالار قايتا ەنگىزىلۋى مۇمكىن. بۇل تۋرالى دەنساۋلىق ساقتاۋ ءمينيسترى الەكسەي تسوي مالىمدەدى. 

«بۇعان دەيىن بولعان كارانتيننەن ساباق الۋىمىز كەرەك. وسى ورايدا، دەنساۋلىق ساقتاۋ جۇيەسىن ءتيىستى دايىندىقتان وتكىزدىك، ياعني اۋرۋحاناداعى ورىندار مەن ءدارى-دارمەك، جابدىقتار جانە باسقا دا قاجەتتى زاتتار تولىقتىرىلدى. ەڭ ماڭىزدىسى – ول ءار ادام قاۋىپسىزدىك ەرەجەسى مەن الەۋمەتتىك قاشىقتىقتى ساقتاۋى كەرەك»، - دەدى مينيستر.

الەكسەي تسوي تۇرعىنداردىڭ قوعامدىق ورىنداردا ساقتىق شارالارىن مۇقيات ورىندامايتىنىنا قىنجىلىس ءبىلدىردى.

«قۇقىق قورعاۋ ورگاندارى ءبىزدىڭ اۋماقتىق دەپارتامەنتتەرىمىزبەن بىرلەسە وسى باعىتتا قاجەتتى شارالاردى قابىلداۋدا. وكىنىشكە قاراي، ايىپپۇلدار دا سالىنۋدا. اي سايىن ايىپپۇل سانى ارتىپ كەلەدى. بۇل، ءوز كەزەگىندە بىزدە رەجيمنىڭ ورىندالماي تۇرعانىن بايقاتادى. ەلىمىزدەگى جاعداي تۇراقتى. دەگەنمەن، ءتيىستى تالاپتاردى ورىنداماساق، كارانتين ەنگىزىلۋى مۇمكىن. ىندەتكە توسقاۋىل قويۋ وزىمىزگە بايلانىستى. سوندىقتان بارلىعىن ورىنداساق، كاراتين ەنگىزىلمەۋى ىقتيمال.»، - دەدى ۆەدومستۆو باسشىسى.

ەسكە سالا كەتەيىك، بۇعان دەيىن دەنساۋلىق ساقتاۋ ءمينيسترى ىندەتتىڭ تارالۋىنا توسقاۋىل قويۋ ماقساتىندا حالىقارالىق رەيستەردى جانداندىرۋدى توقتاتۋدى ۇسىنعان بولاتىن. سونداي-اق، الەكسەي تسوي بۇگىنگە دەيىن اۋە قاتىناستارى رەتكە كەلتىرىلگەن ەلدەرمەن اۋە رەيستەرىن ارتتىرماۋ، ودان بولەك تۇركيا رەسپۋبليكاسىنا رەيستەر سانىن ازايتۋ قاجەتتىگىن ايتتى.

ايتا كەتسەك، 26 قىركۇيەكتەن باستاپ نۇر-سۇلتاننان ماسكەۋگە اۋە رەيستەرى جانداندى. «Air Astana» اۋە كومپانياسىنىڭ حابارلاۋىنشا, ازىرگە بۇل رەيسكە تەك قازاقستان مەن رەسەي فەدەراتسياسىنىڭ ازاماتتارى جانە قر-دا تۇرۋعا ىقتيارحاتى بار ادامدار قابىلدانادى.

سونداي-اق، 20 قىركۇيەكتەن باستاپ قىرعىزستانعا حالىقارالىق رەيستەر قايتا جاڭارتىلدى. «Air Astana» كومپانياسىنىڭ ۇشاقتارى الماتى – بىشكەك باعىتى بويىنشا اپتاسىنا 2 رەت ۇشادى.

سوڭعى جاڭالىقتار