1 قازان, 17:48 418 0 پرايمەريز انار لەپەسوۆا

بەكجىگىت سەردالى: پرايمەريزدىڭ ۇگىت-ناسيحات جۇمىستارى كەزىندە كىمنىڭ كىم ەكەنىن تانىدىق

بەكجىگىت سەردالى، جۋرناليست، كومپوزيتور، ق.ا.ياساۋي اتىنداعى حقتۋ-دىڭ پروفەسسورى:

 –  جالپى دەپۋتتارتارعا دەگەن ەل ىشىندەگى كوزقاراس وسى ۋاقىتقا دەيىن ءار ءتۇرلى بولىپ كەلدى. بۇعان دەيىنگى سايلاۋلاردا كەيبىر دەپۋتاتار شىن مانىندە حالىق قالاۋلىسى اتانسا، كەيبىرەۋلەرى مانداتقا قينالماي-اق يە بولىپ، ءوزىنىڭ ابىرويى ءۇشىن جۇمىس ىستەگەندەي كورىنەتىن. سودان حالىق ىشىندە دەپۋتات ۇعىمىنا ەكىۇداي پىكىرلەر قالىپتاسقانىن جاسىرا المايمىز. سوندىقتان «Nur Otan» پارتياسىنىڭ سايلاۋعا تۇسپەس بۇرىن، ەلدىڭ قالاۋلىسى بولامىن دەپ ءۇمىت ارتقان ەلگە بەلگىلى ازاماتتاردى پرايمەريز ارقىلى تانىتۋ جۇيەسى قۇپتارلىق تا، قۋانارلىق جاعداي.

ارينە، مۇندا دا بايگەگە سالساڭ جۇيتكىپ شاباتىنداردى دا، ىشىندە جاي عانا «بۇل ءوزى قانداي ىرىكتەۋ؟ نە بولىپ جاتىر ەكەن، بايگەگە ءتۇسىپ كورەيىن» دەپ كىرە سالعانداردى دا بايقاپ قالىپ وتىرمىز. دەگەنمەن پرايمەريزدىڭ ۇگىت-ناسيحات جۇمىستارى كەزىندە ءبىز كىمنىڭ كىم ەكەنىن انىق تانىدىق. بۇرىن دەپۋتتاتتىققا سايلاۋ الدىندا ۇگىت-ناسيحات كەزدەرىندە كوشە بويىندا ىلىنگەن پلاكاتتاردان عانا كوڭىلىمىزدى باساتىن بولساق، بۇل جولى پرايمەريزگە ءتۇسىپ جاتقان ءاربىر ۇمىتكەرمەن جەكە-جەكە تانىسىپ، قويان-قولتىق وتىرىپ سويلەسۋگە، پىكىرلەسۋگە مۇمكىندىك الدىق. مۇنى ءبىز پارتيامىزدىڭ دەپۋتتاردى حالىققا جاقىنداتا ءتۇسۋى دەپ تۇيدىك.

پرايمەريزدىڭ كەزدەسۋ، دەبات كەزەڭدەرىندە كەيبىر ارامىزدا جۇرگەن ازاماتتاردىڭ وي-ءورىسىنىڭ كەڭ ەكەندىگىن، بولاشاققا ۇمىتپەن قاراي الاتىندىعىن، ويلارىندا نەبىر كراتيۆتى يدەيالاردىڭ جۇرگەنىن كورىپ تاڭعالدىق. وسى ۋاقىتقا دەيىن بۇلار قايدا ءجۇر دەگەن سياقتى. وسى پرايمەريزدە ىسكەرلىگى مەن بىلىمدىلىگى ساي پايىمى مەن پاراساتتىلىعى جوعارى دەپۋتتار، باسىم بولىگىندە جاستار كەلسە، جاڭا ءارى ورتا بۋىن وكىلدەرى وتسە دەگەن نيەتتەمىن. سونىڭ ىشىندە سالماقتى، ءبىلىمدى، جالىندى جاستاردىڭ دا كوپتەپ كەلگەنىن قالاعان بولار ەدىم.

بۇگىن ءبىز دە ارنايى ەرەجەگە ساي داۋىسىمىزدى بەردىك. ونلاين جۇيەسى ارقىلى سمارتفونمەن تاڭداۋ جاسادىق. بۇل جەردە ءوز ويىڭمەن وڭاشا قالۋعا مۇمكىندىك تۋعانىن ايتا كەتكەن ءجون. بۇرىندارى سايلاۋ كەزىندە كابيناعا كىرىپ الىپ، اسىعىس-ۇسىگىس جۇمىسقا كەتىپ بارا جاتىپ تاڭداۋ جاسايتىنبىز. ول كەزدە ويلانۋعا دا مۇرشاڭ بولمايتىن. ال بۇگىن ەمىن-ەركىن، اسىقپاي-اپتىقپاي، شاي ءىشىپ وتىرىپ، راحاتتانىپ، كىمنىڭ كىم ەكەنىن وي ەلەگىڭنەن وتكىزىپ تاڭداۋ جاساعانىمىز كوڭىل قۋانتتى. وتباسىمىزبەن اقىلداسۋعا دا، بالاشاعامىزبەن كەڭەسۋگە دە مۇمكىندىك بولدى.

سوڭعى جاڭالىقتار