1 قازان, 18:48 320 0 قوعام انار لەپەسوۆا

قۇس تۇماۋى: مينيسترلىك ىندەتتىڭ تارالۋى توقتاعان وڭىرلەردى اتادى

ەلىمىزدىڭ ءتورت وڭىرىندە، اتاپ ايتقاندا، اقتوبە، جامبىل، قاراعاندى، تۇركىستان وبلىستارىندا جانە شىمكەنت قالاسىندا ءۇي قۇستارىنىڭ قۇس تۇماۋىنان قىرىلۋ جاعدايى توقتادى.

بۇل تۋرالى وكق-دا وتكەن ءباسپاسوز ءماسليحاتىندا قر اشم ۆەتەرينارلىق باقىلاۋ جانە قاداعالاۋ دەپارتامەنتىنىڭ باسشىسى مىندەتىن اتقارۋشى تۇرسىن قابدولدانوۆ مالىمدەدى.

تۇرسىن قابدولدانوۆتىڭ ايتۋىنشا، سقو، پاۆلودار جانە قوستاناي وبلىستارىندا دا قۇستاردىڭ قىرىلۋ دەرەكتەرى ازايىپ كەلەدى.

جالپى، قۇس ءولىمى قازاقستاننىڭ 7 وبلىسىنىڭ 41 اۋدانىنىڭ 99 ەلدىمەكەنىندە تىركەلگەن. قىرىلعان 588 مىڭ تاۋىق كومىلىپ، ەسەپكە الىنعان. بىراق قر اشم ۆەتەرينارلىق باقىلاۋ جانە قاداعالاۋ دەپارتامەنتىنىڭ انىقتاۋىنشا، ونىڭ ىشىندە  قۇس تۇماۋىنان ولگەندەرى – 329 651 باس.

تۇرسىن قابدولدانوۆ وتەماقى تەك ىندەتتەن قىرىلعان قۇستار ءۇشىن تولەنەتىنىن ەسكەرتتى. ال تابيعي شىعىن ءۇشىن مەملەكەت تۇرعىندارعا اقى تولەمەيدى.

 

سوڭعى جاڭالىقتار