1 قازان, 15:56 416 0 پرايمەريز انار لەپەسوۆا

باعدات مۋسين: پرايمەريز – ەلدىڭ قوعامدىق-ساياسي دامۋىنداعى جاڭا كەزەڭ

تسيفرلىق دامۋ، يننوۆاتسيالار جانە اەروعارىش ونەركاسىبى مينيسترى باعدات مۋسين Facebook-پاراقشاسىندا پرايمەريز تۋرالى پىكىر ءبىلدىردى.

مينيستر پرايمەريز وتكىزۋ بارىسىنداعى جۇمىستار ويداعىداي اتقارىلىپ جاتقانىن جانە بۇگىندە قانشاما ادام روليك دايىنداپ، قاتىسۋعا بەل بۋعانىن ايتتى.

«ءبىزدىڭ حقكو-نىڭ وزىنەن 119 ادام پرايمەريزگە ءوز كانديداتۋراسىن ۇسىندى! مەنىڭ اكەم دە باعىن سىناپ كورۋگە شەشىم قابىلدادى. الايدا ونى رايىنان قايتارعىم كەلدى. بىراق ەكىنشى جاعىنان قاراساق، ءاربىر بەلسەندى ازامات قاتىسقىسى كەلسە، ونىڭ قانداي زيانى بار؟ پارتيا مۇشەسى رەتىندە «پرايمەريز» قوسىمشاسىنا كىردىم. ءبىرىنشى بەتتەن باستاپ جاعىمدى دۇنيە، تۇسىنىكتى ءارى ىڭعايلى ينتەرفەيس. ناقتى ۋاقىت رەجيمىندە بەرىلگەن وتىنىشتەردىڭ سانىن بايقاۋعا بولادى، ال داۋىس بەرۋ كەزىندە پروتسەستى باقىلاي الاسىڭ. قىزىق ءۇشىن جۇيەنى اينالىپ ءوتىپ، جاڭا اككاۋنتپەن تىركەلدىم. الايدا شيفرلاۋ جانە قورعانىس جۇيەسى بۇعان توتەپ بەردى. تەلەفون ارقىلى قايتا كىرگەن كەزدە، پروتسەستى جىلدامداتىپ، اۆتوماتتى تۇردە Pin, Face نەمەسە Touch ID راستاعاننان كەيىن كىرۋدى ۇسىنادى. قاۋىپسىزدىك بويىنشا ءارتۇرلى ساراپشىلارمەن، سونىڭ ىشىندە كيبەرشابۋىلداردى تالداۋ جانە تەرگەۋ ورتالىعىمەن جۇمىس ىستەدىك. ولارمەن سويلەسكەننەن كەيىن، شيفرلاۋ جۇيەسىن DDoS شابۋىلدارىنان قورعاۋ جانە سەنىمدىلىگىن قامتاماسىز ەتۋ بويىنشا جۇمىس جۇرگىزىلدى. سايتتىڭ ءوزى جانە AppStore مەن Google Play-دەگى قولجەتىمدى ءموبيلدى قوسىمشالار وتە جاقسى جۇمىس ىستەيدى، كىدىرۋ جانە شاعىمدار جوق. پرايمەريز – ەلدىڭ قوعامدىق-ساياسي دامۋىنداعى جاڭا كەزەڭ، ويتكەنى بۇل «Nur Otan» پارتياسىنا حالىق اراسىنان  وزىندىك كوزقاراسى بار، وزەكتى ماسەلەلەردى بىلەتىن، كوشباسشى ازاماتتاردى تارتۋعا كومەكتەسەدى. جاقىندا داۋىس بەرۋ باستالادى، مەن دە مىندەتتى تۇردە داۋىس بەرەمىن. قاتىسۋشىلارعا ساتتىلىك!

P.S. تاعى ءبىر فاكت قۋانتادى، جۇيە مەن قوسىمشانى تولىعىمەن ءوزىمىزدىڭ ماماندار قۇراستىردى. داۋىس بەرۋ بارىسىن جانە ونىڭ ناتيجەلەرىن باقىلاۋ قىزىقتى بولادى»، – دەپ جازدى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترى مۋسين الەۋمەتتىك جەلىدەگى پاراقشاسىندا.

سوڭعى جاڭالىقتار