1 قازان, 14:07 377 0 پرايمەريز انار لەپەسوۆا

«Nur Otan» حاتشىسى «پرايمەريز» جۇيەسى جۇمىسىنىڭ تەجەلۋ سەبەبىن ءتۇسىندىردى

بۇگىن «Nur Otan» پارتياسى پرايمەريزىنىڭ داۋىس بەرۋ كەزەڭى باستالدى. 10 076 كانديدات جەڭىستەن ءۇمىتتى. قازىرگى ۋاقىتتا «پرايمەريز» اقپاراتتىق جۇيەسىنە 728 879 ادام تىركەلگەن. بۇل تۋرالى پارتيا حاتشىسى الىبەك الدەنەي مالىمدەدى.

ونىڭ ايتۋىنشا، داۋىس بەرۋ باستالعان ساتتەن جۇيەگە تىركەلۋشىلەردىڭ بەلسەندىلىگى جوعارى. ساعات 11:00-گە دە ءبىر مەزەتتەگى جۇكتەمە 76 مىڭنان استام سۇرانىسقا جەتكەن.

"مۇنىڭ بارلىعى جۇيەگە ارتىق سالماق تۇسىرۋگە اكەلەدى، ول تيىسىنشە پروتسەسستى ەداۋىر باياۋلاتىپ، سۇرانىستاردى وڭدەۋ ۋاقىتىن ۇلعايتادى. قازىر ءبىزدىڭ IT-ماماندارىمىز تەحنيكالىق ىركىلىستەردى جويۋ، ارنالاردىڭ وتكىزۋ مۇمكىندىكتەرىن ارتتىرۋ شارالارىن قولعا الۋدا", - دەپ جازدى پارتيا حاتشىسى Facebook-تەگى پاراقشاسىندا.

الىبەك الدەنەيدىڭ سوزىنشە، «داۋىس بەرۋ ناتيجەلەرى» ءبولىمىنىڭ جاڭارتىلۋى 30 مينۋتتان 1 ساعاتقا دەيىن ۋاقىت الادى. بۇل الگوريتم جۇيەگە تۇسەتىن جۇكتەمەنى تومەندەتۋ ءۇشىن ەنگىزىلگەن.

"تالداۋ كوپتەگەن قولدانۋشىنىڭ جۇيەدە ساعاتتاپ وتىرعانىن كورسەتتى. سوندىقتان كانديداتتاردان جانە باسقادا قولدانۋشىلاردان جۇيەگە قايتا-قايتا كىرۋدى توقتاتا تۇرىپ، پارتيالىقتاردىڭ داۋىس بەرۋلەرىنە مۇمكىندىك بەرۋلەرىن سۇرايمىن", - دەدى ءا.الدەنەي.

سونداي-اق، «Nur Otan» حاتشىسى ءاربىر پارتيالىقتىڭ داۋىس بەرۋ ناتيجەلەرى ساقتالاتىنىن جانە سۇرانىستاردى وڭدەۋ بارىسىنا قاراي مىندەتتى تۇردە جۇيەدە كورسەتىلەتىن اتاپ ءوتتى.

"قورعانىس جانە شيفرلاۋ كەز كەلگەن بۇرمالاۋشىلىققا جول بەرمەيدى. ەلىمىزدىڭ ەڭ شالعاي ەلدى مەكەندەرىنىڭ تۇرعىندارىن قوسا العاندا پارتيانىڭ بارلىق مۇشەسى داۋىس بەرە الادى. تەز ارادا بارلىق ماسەلەنىڭ شەشىلەتىنىنە سەنىمدىمىن. ۋاقىت جەتكىلىكتى. ءاربىر ازامات داۋىس بەرە الادى!", - دەپ جازدى ول.

سوڭعى جاڭالىقتار