1 قازان, 13:35 390 0 الەۋمەت انار لەپەسوۆا

اليمەنت تولەۋدەن جالتارعان ەكىباستۇزدىق 4 بولمەلى پاتەرىنەن ايرىلدى

پاۆلودار وبلىسىنىڭ جەكە سوت ورىنداۋشىسى اليمەنت بويىنشا قارىزى ءۇشىن ەكىباستۇز قالاسى تۇرعىنىنىڭ 4 بولمەلى پاتەرىن ساتتى. 

قر ادىلەت مينيسترلىگىنىڭ مالىمەتىنشە، 2016 جىلدان بەرى نەمقۇرايلىق تانىتقان اكە بالاسىنا جالپى سوماسى 2,2 ملن تەڭگە مولشەرىندە اليمەنت قارىز بولىپ قالعان.

«بورىشكەر بىرنەشە رەت جەكە سوت ورىنداۋشىسىنا شاقىرىلىپ، بالاسىن اسىراۋعا اليمەنت تولەۋ قاجەتتىلىگى تۋرالى ەسكەرتىلدى. الايدا، ول سوت شەشىمىن نازارعا الماي، تۋعان بالاسىنا كومەكتەسۋگە اسىقپادى. وسىعان بايلانىستى پاۆلودار وبلىسىنىڭ جەكە سوت ورىنداۋشىسى ەكىباستۇز قالالىق سوتىنا جىلجىمايتىن مۇلىكتى ءوندىرىپ الۋ تۋرالى ۇسىنىم بەردى. كەيىننەن ەلەكتروندىق اۋكتسيون قورىتىندىسى بويىنشا جوعارىدا اتالعان پاتەر 4,6 ملن تەڭگەگە ساتىلدى. جەكە سوت ورىنداۋشىسىنىڭ ءىس-ارەكەتىنىڭ ارقاسىندا بالا زاڭمەن بەلگىلەنگەن 2,2 ملن تەڭگە مولشەرىندەگى قاراجاتقا يە بولدى. قالعان سوما بورىشكەرگە قايتارىلدى»، - دەپ اتاپ وتەدى ۆەدومستۆودان.

 

سوڭعى جاڭالىقتار