1 قازان, 18:11 298 0 قوعام Túrkistan Gazeti

قاريالار قامسىز بولسا...

«قارتى بار ءۇيدىڭ قازىناسى بار» دەيدى اتام قازاق. ءسوزىنىڭ ساراسىمەن، پاراساتتى ساناسىمەن جول سىلتەر، ءجون كورسەتەر كونەكوز قاريالارىمىز امەندە امان جۇرسە، جاستارىمىز جولىنان دا، جونىنەن دە اداسپايتىنى ايدان انىق.

1 قازان – حالىقارالىق قارتتار كۇنى قارساڭىندا ارا­مىزدا ارداگەرلەرىمىزدى تۇگەندەپ، اڭگىمەگە تارتاتىن جاق­سى ءداستۇرىمىز بار. وسى جولى ماقالامىزدى زاپاستاعى مايور ينسافيتدين گارەەۆ اقساقالعا ارناماقپىز.

– مەن 1986 جىلى قۇرمەتتى ەڭبەك دەمالىسىنا شىق­قان­مىن. مەكتەپتە دەنە شىنىقتىرۋ جانە العاشقى ءاس­كە­ري دايىندىق پاندەرىنەن كوپ جىل بويى ساباق بەردىم. استانادا اشىلعان قارجى كوللەدجىندە دە ۇستازدىق ەتتىم. مەرزىمدى قىزمەتتى قوسقاندا وتىز جىل اسكەري قىز­مەتتە بولدىم. وتان قايدا جىبەرەدى، باسشىلىق قايدا نۇس­­قايدى، بارلىق جەردە قىزمەت اتقارعانمىن. قى­زى­لوردا، ارقالىق قالالارىنداعى ىشكى اسكەرلەردىڭ جەكە ات­قىشتار روتاسىندا العاشقى قىزمەت جولىمدى باستادىم. ول كەزدە كازارمادا ساربازدارمەن بىرگە  قونىپ، ءبىر­گە قۇرىلىس جۇمىستارىن ىستەگەنبىز. قازىرگى سارباز­دار­عا قاراپ، ولاردىڭ جاعدايىن كورىپ، ىشتەي ريزا بولامىن. بارلىق جاعداي جاسالعان، – دەيدى ارداگەر.

ەسكى قالامەن كەلە جاتىرمىز. ارداگەر ۇيلەرگە قارا­عان بويى ءوزىنىڭ اسكەري قىزمەت جىلدارىن ەسىنە ءتۇسىردى.

«بۇگىنگى قالاعا قاراپ قۋاناتىنداي جاعدايعا جەتتىك. ەسكى تىڭ يگەرۋشىلەردىڭ قالاسى جاڭا اتاۋمەن بۇكىل ەلى­مىزدىڭ استاناسىنا اينالدى. مەن وسى قالاعا كەلگەندە تۇر­عىن ءۇي ماسەلەسى شەشىلدى. اۋىسىپ كەلگەن بويدا ءبىر ەمەس، بىردەن جەتى قىزمەتتىك پاتەر بوس بولعان. بالكىم، كو­بىسى باسقا قالالاردى تاڭداعىسى كەلگەن شىعار، وزىمە وسى قالا قاتتى ۇنادى. تازا اۋا، شاعىن، جاسىل ەدى. مەن اۋى­سىپ كەلگەن كەشەگى ىشكى اسكەرلەر بۇگىنگى ۇلتتىق ۇلان­نىڭ 6636 اسكەري ءبولىمى ەڭ كونە اسكەري بولىمدەردىڭ قا­تارىندا. ءبىزدىڭ قىزمەت قىلمىسكەرلەر مەن باس بوستان­دى­عىنان ايىرىلعانداردى ايداۋىلداۋ مەن تۇزەتۋ مەكە­مەلەرىن كۇزەتۋمەن ەتەنە بايلانىستى بولدى. ءبىز وسىنداي قيىن دا قىزىقتى قىزمەتتى ەش قىنجىلماستان اتقارا­تىن­بىز. ويتكەنى ءبىزدىڭ بۋىندا وتانعا دەگەن ءسۇيىس­پەن­شىلىگىمىز باسىم بولدى»، – دەيدى ول.

قۇقىقتىق ءتارتىپ اسكەرىنىڭ ارداگەرى جاۋىنگەرلەردىڭ دايارلىعىنا قاتتى كوڭىل بولگەن جان. ساربازدارىمەن كەش باتىرىپ، تاڭ اتىرعان. ءوز زامانىنىڭ ادامى رەتىندە بار كۇش-جىگەرىن اسكەري قىزمەتكە ارنادى. سوعان قارا­ماستان، ءوزىنىڭ جانۇياسىنا دا كوڭىل ءبولۋدى ۇمىت­پاعان. ومىرلىك جارى نينا ستەپانوۆنامەن قىزىلوردا قالاسىنداعى 1 مامىر – ەڭبەكشىلەر مەرەكەسىنە ارنالعان شارا­دا تانىسقان. نينا اپاي كەزىندە سىر وڭىرىنە جەر اۋدارىلعان كارىس دياسپوراسىنىڭ وكىلى بولسا، ينسافيتدين اقساقال باشقۇرتستاندا تۋعان تاتار جىگىتى. كۇيەۋ با­لاسى ۋكراين ۇلتىنان، كەلىنى قازاقتىڭ قىزى. نەمەرەلەرى دە وتباسىن قۇرىپ، بۇگىندە شوبەرەلەرى دە ۇلكەن اتا­لارىنىڭ تاربيەسىن كورۋدە. شۋاقتى شاڭىراقتىڭ ۇيىت­قىسىنا اينالعان ەرلى-زايىپتى گارەەۆتەر تەك ءوز وت­ب­اسىنا ەمەس، بۇگىنگى وسكەلەڭ ۇرپاق ءۇشىن دە ۇلگى بولماق.

ءومىردىڭ سۇرلەۋىنەن سۇرىنبەي وتكەن وسىنداي كۇرەس­كەر جانداردى كورگەندە ارداگەرلەرىم امان بولعاي دەپ ايتقىمىز كەلەدى.

دارىن سەيىتوۆ،

مايور

سوڭعى جاڭالىقتار