1 قازان, 12:40 440 0 ساراپتاما انار لەپەسوۆا

يەك استىنداعىعا يە بولا الماعاندار باسشى بولىپ جارىتا ما؟

جىل باسىنان بەرى ەلىمىزدە 993 پارا الۋ وقيعاسى تىركەلگەن. بۇل 2019 جىلدىڭ وسى كەزەڭىمەن سالىستىرعاندا 11,4 پايىزعا كوپ. قوعامنىڭ جەگى قۇرتىنا اينالعان جەمقورلىقتى جويۋ ءۇشىن مەملەكەت باسشىسى قاسىم-جومارت توقاەۆ بيىلعى جولداۋىندا پارا العاندارعا، مەملەكەت قارجىسىن جىمقىرعاندارعا جازانى قاتايتۋدى تاپسىردى. سونداي-اق پرەزيدەنت جەمقورلىقپەن ۇستالعانداردىڭ مەملەكەتتىك، كۆازيمەملەكەتتىك سالاداعى قىزمەتكە كەلۋىنە ءومىر بويىنا تىيىم سالاتىن قاعيدا ورناتۋ كەرەگىن ايتتى. 

قىزمەتكەرىنىڭ پاراقورلىعى ءۇشىن باسشى جاۋاپتى

پاراقورلىقپەن كۇرەستى كۇشەيتۋ ماسەلەسىن قاسىم-جومارت توقاەۆ بۇعان دەيىن دە بىرنەشە مارتە كوتەرگەن. بيىل 19 تامىزدا وتكەن جەمقورلىقپەن كۇرەس ماسەلەلەرى جونىندەگى كەڭەستە پرەزيدەنت سىبايلاس جەمقورلىق قىلمىسى بويىنشا سوتتالعانداردى شارتتى تۇردە مەرزىمىنەن بۇرىن بوساتۋعا زاڭ جۇزىندە تىيىم سالۋدى تاپسىردى. ال وتكەن جىلدىڭ مامىرىندا ۇكىمەت مۇشەلەرىمەن وتكىزىلگەن جينالىستا قولاستىنداعى قىزمەتكەرلەردىڭ پارا العانى ءۇشىن ءبىرىنشى باسشىلار جاۋاپتى بولاتىنىن قاداپ ايتتى.

– ەگەر ءبىز جەمقورلىقتى تۇبەگەيلى جويۋدى مىندەت ەتىپ الساق، مەنىڭشە، مەملەكەتتىك ورگان باسشىلارى مۇنداي جاعدايدا وتستاۆكاعا كەتۋى كەرەك. ولاردىڭ وتستاۆكاعا كەتۋىن قابىلداۋدى نەمەسە قابىلداماۋدى مەملەكەت باسشىسى شەشەدى. بىراق جۇمىستان بوساتۋ تۋرالى ارىز جازۋى مىندەتتى شارا بولۋى كەرەك، – دەدى پرەزيدەنت.

مەملەكەت باسشىسىنىڭ پارمەنىمەن 2019 جىلدىڭ قاراشاسىندا زاڭعا ءوز­­گەرىس ەنگىزىلدى. تاۋەلسىز قازاقستان تاري­حىن­دا تۇڭعىش رەت باسشىلاردىڭ قولاس­تىن­داعى قىزمەتكەرلەرى ءۇشىن جاۋاپكەرشىلىگى زاڭنامالىق دەڭگەيدە بەكىتىلدى.  «مەملەكەتتىك قىزمەت جانە سىبايلاس جەمقورلىققا قار­سى ءىس-قيمىل ماسەلەلەرى بويىنشا قا­زاق­ستان رەسپۋبليكاسىنىڭ كەيبىر زاڭناما اك­تىلەرىنە وزگەرىستەر مەن تولىقتىرۋلار ەن­گىزۋ تۋرالى» زاڭ بويىنشا، مەملەكەتتىك قىز­مەتكەر جەمقورلىقپەن ۇستالسا، باسشىسى ءوز ەركىمەن قىزمەتتەن كەتۋى ءتيىس. ەرەجە بويىن­شا مۇنداي باسشى قولاستىنداعى قىز­مەتكەرگە قاتىستى سوت ۇكىمى شىققاننان كەيىن 10 كۇننىڭ ىشىندە قىزمەتىنەن كەتۋ تۋرالى ءوتىنىش بەرۋگە مىندەتتى. زاڭ وتكەن جىلدىڭ 10 جەلتوقسانىنان كەيىن جاسالعان قىل­مىستارعا قاتىستى. تاعى ءبىر ايتا كەتەرلىگى، مەملەكەتتىك قىزمەتكەر جۇمىسقا الىن­عاننان سوڭ ءۇش اي وتكەننەن كەيىن جاسالعان جەم­قورلىق ءۇشىن عانا جاۋاپتى بولماق.

وسى ورايدا، زاڭ بويىنشا قانداي تۇل­عالار تىكەلەي باعىنىشتىلار رە­تىندە قاراستىرىلاتىنىن ناقتىلاي كەتەيىك. ورتالىق مەملەكەتتىك ورگاننىڭ باس­شىسى (مينيستر) ءوز ورىنباسارلارىنىڭ، جاۋاپ­تى حاتشى نەمەسە اپپارات باسشى­سى­نىڭ جانە ايماقتىق بولىمشەلەر باسشى­لارى­نىڭ قىلمىسى ءۇشىن جاۋاپ بەرەدى. وبلىس، رەسپۋبليكالىق ماڭىزى بار قالالار جانە استانا اكىمى ءوز ورىنباسارلارىنىڭ، اپپارات باسشىسى جانە اۋدان (وبلىستىق ماڭى­زى بار قالانىڭ) اكىمدەرىنىڭ جەم­قور­لىعى ءۇشىن قىزمەتىنەن كەتۋگە مىندەتتى. ال ور­تالىق مەملەكەتتىك ورگان باسشىسىنىڭ ورىن­­باسارى (ۆيتسە-مينيستر) ءوز قاراماعىن­داعى بولىمشە نەمەسە تاۋەلسىز قۇرىلىمدىق بولىمشە باسشىسىنىڭ پارا العانى ءۇشىن لاۋازىمدى قىزمەتىنەن ايىرىلادى. وبلىس اكىمىنىڭ ورىنباسارى جەرگىلىكتى بيۋدجەتتەن قارجىلاندىرىلاتىن اتقارۋشى ورگاندار­دىڭ باسشىلارىنا جاۋاپ بەرسە، اۋدان اكىمى ءوزىنىڭ ورىنباسارلارى، اپپارات باسشىسى، جەتەكشىلىك ەتەتىن اۋداندىق اتقارۋشى ور­گان­داردىڭ باسشىلارى، اۋىل، اۋىلدىق وك­رۋگ­تەردىڭ اكىمدەرى ءۇشىن جاۋاپتى.

قولاستىنداعىلاردىڭ قىلمىسى ءۇشىن قىزمەتىنەن كەتكەندەر

«مەملەكەتتىك قىزمەت تۋرالى» زاڭعا ءساي­كەس، قولاستىنداعى قىزمەتكەرىنىڭ جەم­قور­لىعى ءۇشىن قىزمەتىنەن كەتۋگە بەكىنگەن باس­شى ءوزىن وسى لاۋازىمعا تاعايىنداعان لاۋا­زىمدى تۇلعاعا ورنىنان كەتۋ تۋرالى ءوتى­نىش جىبەرەدى. وتستاۆكانى قابىلداۋ ن­ە­مە­سە قابىلداماۋ – بۇل ساياسي قىزمەتكەردى قىز­مەتكە تاعايىنداعان ادامنىڭ قۇزىرەتى.

ماسەلەن، جۋىردا اپپارات باسشىسى 1,5 ملن تەڭگە پارامەن ۇستالعانى ءۇشىن تەكەلى قالاسىنىڭ اكىمى باقتيار ونەر­باەۆ الماتى وبلىسىنىڭ اكىمى اماندىق با­تا­لوۆقا ءوتىنىش جازىپ، وتستاۆكاعا جىبەرۋىن سۇرادى. بۇل جاڭالىق جەرگىلىكتى تۇر­عىنداردى قۋانتا قويمادى. الەۋمەتتىك جە­لى­دە جۇدىرىقتاي جۇمىلعان تەكەلىلىكتەر اكىمدەرىن جۇمىستان شىعارماۋدى ءوتىندى. حا­لىقتىڭ سوزىنشە، ب.ونەرباەۆ تەكەلىگە اكىم بولىپ كەلگەلى قۇرىلىس جاندانىپ، باس­پاناسىزدار ءۇيلى بولىپ، كوشەلەر ءجون­دەلىپ، قالانىڭ تىنىسى اشىلا باستاعان. دەسە دە، وزگە اكىم-قارالارعا ساباق بولسىن دە­گەن بولار، ءبىر ايعا جۋىق ۋاقىت ويلانعان امان­دىق باتالوۆ باقتيار ونەرباەۆتى قىز­مە­تىنەن بوساتۋ تۋرالى شەشىم قابىلدادى.

ال 1,5 ملن تەڭگەنى قالتاعا باسقان اپپارات باسشىسى العان پاراسىن مەملەكەتكە ون ەسە قىلىپ قايتارۋعا مىندەتتەلىپ، ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى. اسا ماڭىزدى ىستەر جونىندەگى تەرگەۋشى قايسار بارجاقسىنوۆتىڭ ايتۋىنشا، شەنەۋنىك مۇگەدەكتەر قوعامىنىڭ ديرەكتورىنان پارا الىپ، قالانى اباتتان­دىرۋعا قاتىستى راسىمدەلگەن كەلىسىمشارتتار بويىنشا قامقورلىق جاساۋعا ۋادە بەرگەن. قىلمىسى اشكەرەلەنگەن ساتتە وقيعا ورنىنان تۇرا قاشقان اپپارات جەتەكشىسى وزەنگە سەكىرگەنىن ەل ۇمىتا قويماعان بولار.  ارعى جاعاعا جەتىپ، ءىز سۋىتامىن دەپ جانتا­لاس­قان شەنەۋنىكتى سۋدىڭ اعىسى الىپ كەتە جازداعان ەدى. الايدا سىبايلاس جەمقورلىققا قارسى قىزمەت ماماندارى ونى قۇرىقتادى.

بيىل 3 قىركۇيەكتە سولتۇستىك قازاق­ستان وبلىسى اكىمىنىڭ ورىنباسارى ان­تون فەدياەۆ پەن اقجار اۋدانىنىڭ اكىمى ەر­باتىر مادياروۆ تا قىزمەتىنەن كەتتى. بۇعان ايماقتىڭ مەملەكەتتiك ساۋلەت-قۇرى­لىس باقىلاۋ جانە ليتسەنزيالاۋ باسقار­ما­سى­نىڭ بۇرىنعى باسشىسى باتىربەك قا­لاباەۆتىڭ بىرنەشە رەت، جالپى سوماسى 650 مىڭ تەڭگە كولەمىندە پارا الۋى سەبەپ. تەر­گەۋ مالىمەتى بويىنشا، باسقارما باسشىسى ءۇش رەت زاڭسىز سىياقى العان. بۇل ىسكە اق­جار اۋدانى اكىمىنىڭ ورىنباسارى قۇرال دو­سىمبەكوۆ تە ارالاسقان كورىنەدى.

14 شىلدەدە قالاباەۆتىڭ ۇكىمى شىعىپ، 26,6 ميلليون تەڭگە كولەمىندە ايىپپۇل سا­لىندى. سونداي-اق ونىڭ مەملەكەتتىك قىز­مەت­تە جۇمىس ىستەۋىنە ءومىر بويىنا تىيىم سا­لىندى. وسى جاعدايدان سوڭ انتون فەدياەۆ پەن ەرباتىر مادياروۆ ءوز ەركىمەن قىز­مەت­تەن كەتۋگە ءوتىنىش جازعان. وبلىس اكىمى 3 قىر­كۇيەكتە ولاردىڭ وتستاۆكاسىن قابىل­دادى.

قولاستىنداعى ءبولىم باسشىسىنىڭ پاراق­ورلىعى ءۇشىن 2020 جىلعى ناۋ­رىزدا باتىس قازاقستان وبلىسى شىڭعىرلاۋ اۋدا­نىنىڭ اكىمى ەرجان تۇرماعامبەتوۆ تە قىزمەتىنەن ايىرىلدى. تەرگەۋ مالىمەتىنە سۇيەنسەك، اۋداندىق ءبىلىم ءبولىمىنىڭ باسشىسى ا.ساپاروۆ ورىندالعان جۇمىستىڭ اكتىسىنە قول قويۋ ءۇشىن جەكە كاسىپكەردى اكىمدىكتىڭ لاۋا­زىمدى تۇلعالارىنا 1 ميلليون 690 مىڭ تەڭگە كولەمىندە پارا بەرۋگە يتەرمەلەگەن. 21 قاڭتاردا سوت ۇكىمى شىعىپ، ساپاروۆ 3 جىل 6 ايعا باس بوستاندىعىنان ايىرىلدى. ال ناۋرىزدا ونىڭ تىكەلەي باسشىسى – اۋدان اكىمى ەرجان تۇرماعامبەتوۆ ءوز ەركىمەن وتس­تاۆ­كاعا كەتۋگە ءوتىنىش جازىپ، قىزمەتىن بوساتتى.

ال شىلدەدە كەرىسىنشە، اكىمنىڭ جەم­قور­لىعى سالدارىنان اپپارات باسشىسى قىز­مە­تىنەن كەتتى. دالىرەك ايتقاندا، قوستاناي وبلىسى رۋدنىي قالاسى اكىمى اپپاراتىنىڭ باس­شىسى ازامات ىسقاقوۆ قاشار اۋىلى اكى­مىنە قاتىستى تەرگەۋ باستالعان كەزدە ءوز ور­ن­ىن بوساتتى.

قوستاناي وبلىسى سىبايلاس جەم­قور­لىقپەن كۇرەس دەپارتامەنتى قاشار اكىمىنە قاتىستى تەرگەۋ باستالعانىن حا­بار­لاعان. بىراق بۇل ءىستىڭ ءمان-جايى ايتىلمادى. كەيىن بەلگىلى بولعانداي، اۋىل اكىمى مەكەمە با­لانسىندا تۇرعان قىزمەتتىك كولىكتى ءجون­دەۋگە بولىنگەن 1 ميلليون 464 مىڭ تەڭگە بيۋد­جەتتىك قاراجاتتى جەكە كاسىپكەردىڭ ەسەپ­شوتىنا اۋدارۋ ارقىلى قاراجاتتى جىم­قىرعان دەگەن كۇدىككە ءىلىندى. وسى جاع­دايدان كەيىن زاڭعا سۇيەنگەن قالا اكىمى اپ­پاراتىنىڭ باسشىسى ازامات ىسقاقوۆ ءوز ەر­كىمەن قىزمەتىنەن كەتكەن.

بيىل قاراعاندى وبلىسى ساتباەۆ اۋدانىندا دا وسىنداي جەمقورلىق داۋى بولعان ەدى. بىراق وزگە وقيعالاردان ەرەك­شەلىگى، بۇل جولى اكىم وتستاۆكاعا كەتكەن جوق.

وقيعا بىلاي بولعان. تۇرعىن ءۇي-كوم­مۋنالدىق شارۋاشىلىق ءبولى­مى­نىڭ باستىعى كامشات كۇنەدىلوۆا «حلەبستروي» جشس قاراعاندى فيليالى ديرەكتورىنان 1 ميلليون 200 مىڭ تەڭگە كولەمىندە پارا ال­عان. ونىڭ ورنىنا ول ورىندالعان جۇمىس ءۇشىن قابىلداۋ-تاپسىرۋ اكتىسىنە قول قويۋعا ءجا­نە مەملەكەتتىك ساتىپ الۋ شارتى بويىنشا قالعان اقشانى اۋدارۋعا ۋادە بەرگەن.

سوت شەشىمى بويىنشا، كۇنەدىلوۆاعا 12 ميلليون تەڭگە كولەمىندە ايىپپۇل سا­لىنعان. سونداي-اق وعان مەملەكەتتىك قىز­مەت­تەگى لاۋازىمدى قىزمەتتى اتقارۋعا ءومىر بويىنا تىيىم سالىندى. وسى وقيعادان سوڭ ءسات­باەۆ اكىمى اسقار ىدىرىسوۆ وبلىس اكى­مىنە ارىز جازىپ، ءوز ەركىمەن وتستاۆكاعا كەت­پەك بولعان. الايدا وبلىس اكىمى ىدى­رى­سوۆ­تىڭ ارىزىن قابىلدامادى. جەڭىس قا­سىمبەك اسقار ىدىرىسوۆقا قىزمەتكەرلەرىن دۇرىس باقىلاماعانى ءۇشىن سوگىس جاريالاۋمەن شەكتەلدى.

ءىىم: 90 شەندى جىلى ورنىنان ايىرىلدى

قولاستىنداعى قىزمەتكەرلەردىڭ جەم­قور­لىعى ءۇشىن قىزمەتىنەن ايى­رىل­عاندار سانى جونىنەن ىشكى ىستەر مينيسترلىگى كوش باستاپ تۇر. ەلىمىزدە جىل باسىنان بەرى وسىن­داي سەبەپپەن 90 پوليتسيا باسشىسى ور­نىن بوساتقان. مۇنداي ستاتيستيكانى ۆە­دومستۆو باسشىسى ەرلان تۇرعىمباەۆ مەم­لەكەت باسشىسى قاتىسقان جەمقورلىققا قار­سى كۇرەس ماسەلەسى بويىنشا جينالىستا ءما­لىمدەدى.

ونىڭ ايتۋىنشا، ىشكى ىستەر ورگان­دارىن­داعى جەمقورلىقتىڭ 75 پايى­زىن وزىندىك قاۋىپسىزدىك دەپارتامەنتى انىق­تايدى. 2020 جىلدىڭ قاڭتارىنان بەرى جەم­قورلىققا بايلانىستى باسشىلىق قىز­مەت اتقاراتىن 25 پوليتسەي مەن تاعى 90 قىز­مەتكەر جۇمىسىنان ايىرىلعان. وسى ۋا­قىت ارالىعىندا ءتارتىپ ساقشىلارىنا پارا بەرۋدىڭ 118 فاكتىسىنىڭ جولى كەسىلگەن.

ماسەلەن، بيىل تامىزدا الماتى قا­لاسى پوليتسيا دەپارتامەنتى پرو­تسەس­­­سينگ ورتالىعىنىڭ باسشىسى مەن قىز­مەت­كەرى 800 مىڭ تەڭگە كولەمىندە پارا الىپ جاتقان كەزدە ۇستالدى. سىبايلاس جەم­قور­لىققا قارسى ءىس-قيمىل اگەنتتىگىنىڭ حابارلاۋىنشا، ولار 2017 جىلدان باستاپ جالعان سوت ورىنداۋشىسىمەن ءسوز بايلاسىپ، جول قوزعالىسى ەرەجەلەرىن بۇزعان ادامداردىڭ اق­شاسىن الىپ، قالتاسىنا باسىپ وتىرعان. اتال­عان تۇلعالاردىڭ قىلمىستىق ارە­كە­تى­نەن مەملەكەت بيۋدجەتىنە 25 مىڭنان استام اكىم­شىلىك قۇقىقبۇزۋشىلىق ءۇشىن تولەنۋى ءتيىس 270 ميلليون تەڭگەدەن استام قارجى ءتۇس­­پەگەن. كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى. ال قولاستىن­دا­عىلاردىڭ قىلمىسى ءۇشىن الماتى پوليتسيا دەپارتامەنتىنىڭ ءتورت لاۋازىمدى پوليتسەيى قىزمەتىنەن قۋىلدى.

سولتۇستىك قازاقستان وبلىسىندا دا جۋىردا وسىعان ۇقساس وقيعا بولدى. ماع­جان جۇماباەۆ اۋدانىندا پوليتسيا اعا لەي­تەنانتى اكىمشىلىك قۇقىقبۇزۋشىلىق تۋ­رالى حاتتاما تولتىرماعانى ءۇشىن وبلىس ورتالىعىنىڭ تۇرعىنىنان 150 000 تەڭگە كولەمىندە اقشا الىپ جاتقان كەزدە ۇستالدى. سىبايلاس جەمقورلىققا قارسى ءىس-قيمىل ۇلت­تىق بيۋروسى دەپارتامەنتىنىڭ قىزمەت­كەر­لەرى ونى ۋاقىتشا ۇستاۋ يزولياتورىنا قا­مادى. سقو پد تارتىپتىك كوميسسياسىنىڭ شە­شىمىمەن جەمقورلىق جاساعان پوليتسەي ىشكى ىستەر ورگاندارىنان شىعارىلىپ، شەنىنەن ايىرىلدى. ونىڭ تىكەلەي باسشىسى – اۋداندىق پوليتسيا ءبولىمى باستىعىنىڭ ورىن­باسارى دا قىزمەتىنەن كەتتى. سونداي-اق پوليتسيا ءبولىمى مەن وبلىستىق اپپاراتتىڭ 11 باسشىسى قاتاڭ تارتىپتىك جاۋاپكەرشىلىككە تارتىلدى.

دەسە دە، ىشكى ىستەر مينيسترلىگى ۆەدومستۆودا جەمقورلىق قىلمىستار ءوت­كەن جىلمەن سالىستىرعاندا 33 پايىزعا ازاي­عانىن العا تارتۋدا. ۇلتتىق ەكونوميكا مي­نيسترلىگى جۇرگىزگەن ستاتيستيكا قورى­تىن­دىسىنا سىلتەمە جاساعان مينيستر ەرلان تۇر­عىمباەۆتىڭ سوزىنشە، قازاقستان­دىق­تاردىڭ 38 پايىزىنان كوبى ءتارتىپ ساق­شى­لا­رىنا سەنەتىن كورىنەدى. ال ساۋالناماعا قا­تىس­قان 51 پايىز رەسپوندەنت ءىشىنارا سە­نىم بىلدىرەتىنىن مالىمدەپتى. وكىنىشتىسى، رەس­مي ستاتيستيكا مەن اقيقاتتىڭ اراسى ال­شاق بولىپ تۇر.  جول ەرەجەسىن بۇزعاندا ءتار­تىپ ساقشىسىمەن كەلىسىپ، زاڭدى اتتاپ كەتۋ­گە دايىن تۇراتىنداردىڭ كوپ ەكەنى وسى كۇنى ەشكىمگە قۇپيا ەمەس. «پوليتسەيگە 5-10 مىڭ تەڭگە بەرە سالساڭ، ايىپپۇلدان قۇتىلار ەدىڭ عوي»، «ماي قىزمەتكەرى قالاي تەز جىبەرە سالدى، قالتاسىن جاقسىلاپ مايلاعان شى­­عارسىڭ» دەگەن ءسوزدى كولىك تىزگىندەگەن­دەر­دىڭ اۋزىنان ءجيى ەستيتىنىمىزدى جاسىرىپ قايتەمىز؟! قوعامدا زاڭدى بۇزۋ دا، جازادان جالتارۋ دا وڭاي دەگەن قاساڭ تۇسىنىكتىڭ قا­لىپتاسۋىنا پاراقور پوليتسەيلەر عانا ەمەس، قيت ەتسە ولاردىڭ قالتاسىنا تيىن-تەبەن سۇڭگىتۋگە داعدىلانعان قاراپايىم حالىق تا كىنالى ەكەنى تالاسسىز. «ءبىر قارىن مايدى ءشىرى­تەتىن قۇمالاقتاردىڭ» كەسىرىنەن وزدە­رى­نىڭ قىزمەتتىك بورىشىن ادال اتقارىپ جۇرگەن ءتارتىپ ساقشىلارىنىڭ ەڭبەگى ەلەۋسىز قالىپ جاتاتىنى قىنجىلتادى. تاۋەلسىزدىك العاننان بەرى 1 500-گە جۋىق پوليتسيا قىز­مەت­كەرى مەملەكەتتىك ماراپاتقا يە بولسا، ونىڭ 131-ءى قىزمەت بارىسىندا قازا تاپقان ەكەن. بۇگىنگى كۇننىڭ ناعىز باتىرلارى ەكى كۇن­نىڭ بىرىندە جەمقورلىقپەن ۇستالىپ جاتاتىن شەندى-شەكپەندىلەردىڭ تاساسىندا قالىپ قوياتىنى وكىنىشتى.

P.S: اتىراۋ وبلىسىنىڭ اكىمى  ماحامبەت دوسمۇحامبەتوۆتىڭ دە قىزمەتى قىل ۇستىندە تۇر. ويتكەنى جۋىردا ونىڭ ءبىرىنشى ورىنباسارى نۇرلان تاۋباەۆ پەن وبلىستىق قۇرىلىس باسقارماسىنىڭ باسشىسى تيمۋر باساروۆ ۇستالدى. ولار ايماقتىڭ ينفراقۇرىلىمدىق دامۋى مەن جول قۇرىلىسىمەن اينالىساتىن كومپانيالاردىڭ بىرىنەن 182 ميل-
ليون تەڭگە كولەمىندە پارا الدى دەگەن كۇدىككە ءىلىندى. قىلمىستارى دالەلدەنىپ، سوت ۇكىمى شىقسا، ايماق باسشىسى ماحامبەت دوسمۇحامبەتوۆ پرەزيدەنتتىڭ اتىنا وتستاۆكاعا كەتۋ جونىندە ءوتىنىش جازۋعا
ءماجبۇر بولماق.

سوڭعى جاڭالىقتار