1 قازان, 11:21 385 0 جاھان انار لەپەسوۆا

قىرعىزستاندىق وقۋشىلار مەكتەپكە ورالادى

6 قازاننان باستاپ قىرعىزستاننىڭ 1-6 سىنىپ وقۋشىلارى مەكتەپكە بارىپ وقيدى. بۇل تۋرالى ەل ۇكىمەتىنىڭ ءباسپاسوز قىزمەتى حابارلادى.  

كوروناۆيرۋستىڭ تارالۋىنا بايلانىستى قىرعىزستانداعى بارلىق ءبىلىم بەرۋ مەكەمەلەرى ونلاين جۇيەگە كوشكەن. جاڭا وقۋ جىلىندا مەكتەپتەرگە بارۋعا 1 سىنىپ وقۋشىلارىنا عانا رۇقسات بەرىلىپ، باسقا سىنىپتار قاشىقتان وقۋ فورماتىندا قالعان.

ەلدەگى ەپيدەميولوگيالىق احۋالدىڭ وڭالۋىنا بايلانىستى ۇكىمەت 1-6 سىنىپ وقۋشىلارىنىڭ مەكتەپتە ءبىلىم الۋىنا رۇقسات بەرۋدى ءجون كوردى. الايدا ساقتىق شارالارى قاتاڭ ورىندالۋى شارت.

وقۋ پروتسەسى بارىسىندا ىندەت جۇقتىرۋ قاۋپىن ازايتۋ ءۇشىن مۇعالىمدەر مەن وقۋشىلاردىڭ دەنە قىزۋى كۇندەلىكتى تەكسەرىلەدى. سونداي-اق، مەكتەپتە ماسكامەن ءجۇرۋ مىندەتتەلەدى. مەكتەپتەردىڭ ۋاقىتىلى دەزينفەكتسيالانۋىنا، وقۋشىلاردىڭ الەۋمەتتىك قاشىقتىقتى ساقتاۋىنا باسا ءمان بەرىلۋى ءتيىس. ءبىلىم بەرۋ مەكەمەلەرىنە اتا-انالار كىرگىزىلمەۋى قاجەت.

ازىرگە 7-11-سىنىپ وقۋشىلارى قاشان مەكتەپ ورالارى بەلگىسىز. بالاباقشالار جۇمىسىنىڭ قاشان قايتا جانداناتىنى دا ايتىلعان جوق.

ايتا كەتەيىك، 1 قىركۇيەكتەن بەرى قازاقستاندا 104 مەكتەپ وقۋشىسى كوروناۆيرۋس جۇقتىرعان. دەنساۋلىق ساقتاۋ مينيسترلىگىنىڭ مالىمەتىنشە،ونىڭ 33-ءى – كەزەكشى سىنىپتاردا وقيتىن بالالار. ولارمەن قارىم-قاتىناستا بولعان 550 ادام انىقتالىپ، ونىڭ ىشىندە 7 ادامنان كوروناۆيرۋس انىقتالدى. 71 بالا – قاشىقتان وقىپ ءجۇرىپ جۇقتىرىپ العان وقۋشىلار. ولارمەن قارىم-قاتىناستا بولعان 240 ادام انىقتالىپ، ىشىنەن 15 ادامنىڭ ىندەتتى جۇقتىرعانى بەلگىلى بولدى.

سوڭعى جاڭالىقتار