1 قازان, 09:44 345 0 جاھان انار لەپەسوۆا

ۇلىبريتانيا ەكونوميكاسى سوڭعى 65 جىلدا بولماعان دەڭگەيگە قۇلدىرادى

ۇلىبريتانيانىڭ جالپى ىشكى ءونىمى سوڭعى 65 جىلدا بولماعان دەڭگەيگە تومەندەدى. بيىلعى جىلدىڭ  ەكىنشى توقسانىندا ەل ەكونوميكاسى شامامەن 20 پروتسەنتكە قىسقارعان. بۇل تۋرالى ۇلتتىق ستاتيستيكا بيۋروسى حابارلادى.

كورولدىك ەكونوميكاسى قازىر رەتسەسسيانى باستان كەشىرىپ وتىر. ەلدىڭ قيىن جاعدايعا تاپ بولۋىنا كوروناۆيرۋستىڭ تارالۋىن شەكتەۋ ماقساتىندا ەنگىزىلگەن شەكتەۋ شارالارى سەبەپ. كارانتين جاريالانۋى سالدارىنان ۇلىبريتانيادا ءوندىرىس توقتاپ، ەكونوميكانىڭ كوپ سالاسى تابىسىن جوعالتتى.

ەسكە سالا كەتەيىك، بۇدان بۇرىن ۇلىبريتانيادا شەكتەۋ شارالارى كۇشەيتىلگەنىن حابارلاعانبىز. ەلدەگى مەيرامحانالار ساعات كەشكى ونعا دەيىن عانا جۇمىس ىستەيدى. بارلىق مەكەمە قىزمەتكەرلەرى بەتپەردە تاعۋى ءتيىس. سونداي-اق ۇيلەنۋ تويلارىنا شاقىرۋعا رۇقسات ەتىلگەن قوناقتار سانى 15-تەن اسپاۋى ءتيىس. بۇعان دەيىن ۇلىبريتانيالىقتار توي-تومالاققا 30 ادامعا دەيىن شاقىرا الاتىن.

ەلدە كارانتين رەجيمىن بۇزعاندارعا جازا قاتاڭ. كوروناۆيرۋس جۇقتىرعانى راستالعان جانە ەكى اپتالىق وقشاۋلانۋ ەرەجەسىن بىرنەشە رەت بۇزعان ازاماتتار 10 مىڭ فۋنتقا دەيىن (13 مىڭ دوللارعا دەيىن) تولەيدى. ال التى ادامنان ارتىق جينالعاندار 1 مىڭ فۋنت ايىپپۇل ارقالايدى.

 

سوڭعى جاڭالىقتار