30 قىركۇيەك, 20:48 461 0 ايماق انار لەپەسوۆا

جىل سوڭىنا دەيىن جامبىل وبلىسىندا 11 اۋىل ينتەرنەتكە قول جەتكىزەدى

پرەزيدەنت قاسىم-جومارت توقاەۆ حالىق سانى 250-دەن اساتىن ءار اۋىلعا ينتەرنەت تارتۋدى تاپسىرعان بولاتىن. جامبىل وبلىسىندا مەملەكەت باسشىسىنىڭ بۇل تاپسىرماسىنىڭ ورىندالۋ بارىسى قالاي؟ بۇل ساۋالعا جوبالىق باسقارۋ جانە تسيفرلاندىرۋ ورتالىعىنىڭ ديرەكتورى دامير ەگىزباەۆ جاۋاپ بەردى.

ورتالىق باسشىسىنىڭ سوزىنشە، بۇگىندە ايماقتاعى 250-دەن استام تۇرعىنى بار 308 اۋىلدىڭ 166-سى ينتەرنەت جەلىسىنە كەڭ جولاقتى كابەلدىك قولجەتىمدىلىكپەن قوسىلعان. بيىلعى جىلدىڭ  سوڭىنا دەيىن قوسىمشا تاعى 11 ەلدى مەكەن عالامتورعا قول جەتكىزبەك.

308 ەلدى مەكەننىڭ 234-ءى جوعارى جىلدامدىقتى ءموبيلدى ينتەرنەتپەن (3G جانە 4G) قامتاماسىز ەتىلگەن. 23 اۋىلدا ۇيالى بايلانىس وپەراتورلارى ءموبيلدى ينتەرنەتتىڭ جىلدامدىعىن ارتتىرۋ بويىنشا جۇمىستار جۇرگىزۋدە. 50 اۋىلدىق ەلدى مەكەننىڭ تۇرعىندارى عالامتوردىڭ جىلدامدىعىنا شاعىمدانعان.

سونداي-اق، تۇرعىندارىنىڭ سانى 250 ادامنان از 63 اۋىلدىڭ 20-سى جوعارى جىلدامدىقتى ءموبيلدى ينتەرنەتپەن قامتاماسىز ەتىلگەن. جىل سوڭىنا دەيىن تاعى ءبىر اۋىل ينتەرنەتتىڭ يگىلىگىن كورەدى.

تالاس، جامبىل، قورداي اۋداندارىندا ۇيالى بايلانىس وپەراتورلارى ۇيالى بايلانىس انتەننالارىن ورناتۋدا قيىندىقتارعا تاپ بولۋدا. بۇل ماسەلەنى شەشۋ اۋدان اكىمدەرىنە تاپسىرىلدى.

جامبىل وبلىسىنىڭ اكىمى بەردىبەك ساپارباەۆتىڭ شەشىمىمەن وبلىستا ينتەرنەتكە قول جەتىمدىلىك ماسەلەلەرى بويىنشا جۇمىس توبى قۇرىلماق. ونىڭ قۇرامىنا ۇيالى بايلانىس وپەراتورلارىنىڭ وكىلدەرى دە ەنەدى. جاقىن كۇندەرى جۇمىس توبى شالعاي اۋىلداردا ينتەرنەت جىلدامدىعىن ارتتىرۋ جانە كورشى مەملەكەتتىڭ ۇيالى بايلانىس وپەراتورلارىنىڭ بايلانىسىن پايدالاناتىن شەكارا ماڭىنداعى اۋىلدىق وكرۋگ تۇرعىندارىنىڭ  ماسەلەلەرىن شەشۋ جونىندە ۇسىنىستار ازىرلەۋى قاجەت.

ەسكە سالا كەتەيىك، بۇعان دەيىن تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستان قالالارىندا 5G جەلىسى قاشان ىسكە قوسىلاتىنىن ايتقان ەدى.

ءمينيستردىڭ سوزىنشە، نۇر-سۇلتان، الماتى، شىمكەنت قالالارىندا 5G جەلىلەرى 2022 جىلى ىسكە قوسىلادى. ال وبلىس ورتالىقتارىندا جاڭا ۇيالى بايلانىس ستاندارتى 2025 جىلعا دەيىن ەنگىزىلمەك.

 

سوڭعى جاڭالىقتار