30 قىركۇيەك, 20:31 405 0 قوعام انار لەپەسوۆا

قازاقستاندا نەشە ادامنىڭ قوس ازاماتتىعى بار

قازاقستاندا قوس ازاماتتىعى بار 284 ادام انىقتالدى، دەپ حابارلايدى قر ءىىم ءباسپاسوز قىزمەتى.

ءىىم كوشى-قون قىزمەتى مەملەكەتتىك ورگاندارمەن بىرلەسىپ، قازاقستاندا قوس ازاماتتىعى ءۇشىن جاۋاپتىلىققا تارتىلعان 284 بۇرىنعى ازاماتتى انىقتادى.

«ازاماتتىعىنان ايىرىلعان ادامدار بولا تۇرا، ءتارتىپ بۇزۋشىلار قازاقستان رەسپۋبليكاسىنا كەلۋ جانە تۇرۋ ءۇشىن قازاقستاندىق قۇجاتتاردى پايدالاندى. ولاردىڭ بىرقاتارى شەت مەملەكەتتىڭ ازاماتتىعىن قابىلداعانى تۋرالى ۋاقتىلى حابارلاماعانى ءۇشىن اكىمشىلىك جاۋاپكەرشىلىككە تارتىلدى. وسى زاڭ بۇزۋشىلىقتار ءۇشىن 266 ادامعا ( 277 800 تەڭگەدەن 555 مىڭ تەڭگەگە دەيىن) ايىپپۇل سالىنىپ، 18 ادام ەلدەن شىعارىلدى. جازا تاعايىنداۋ تۋرالى شەشىمدى سوت ورگانى قابىلدايدى»، دەلىنگەن حابارلامادا.

حالىقارالىق كەلىسىمدەر قوس ازاماتتىقتى بولدىرماۋ جونىندەگى جۇمىستى جەڭىلدەتەدى، ويتكەنى ەكىنشى تاراپتىڭ ازاماتتىعىن الۋ تۋرالى مالىمەتتەردى قازاقستان قىسقا مەرزىمدە الادى.

«سوڭعى 2 جىلدا ءىىم-ءنىڭ باستاماسىمەن كوشى-قون سالاسىندا 23 حالىقارالىق كەلىسىمگە قول قويىلدى. ولاردىڭ 5-ءۋى كوشى-قون سالاسىنداعى ىنتىماقتاستىقتى رەتتەيدى (ازەربايجانمەن، بەلارۋسپەن، قىرعىزستانمەن، تاجىكستانمەن، وزبەكستانمەن), 15-ءى ادامداردىڭ رەادميسسياسى ماسەلەلەرىن رەتتەيدى (بەلارۋس، ماجارستان، گەرمانيا، قىرعىزستان، لاتۆيا، ليتۆا، مولدوۆا، نورۆەگيا، پولشا، رەسەي، تاجىكستان، وزبەكستان، چەحيا، شۆەيتساريا جانە بەنيليۋكس ەلدەرى) جانە 3-ءى ازاماتتاردىڭ تاراپتار اۋماعىندا بولۋ ءتارتىبىن ايقىندايدى (ازەربايجان، قىرعىزستان، تاجىكستان)»، دەلىنگەن حابارلامادا.

كەلىسىمدەرمەن زاڭسىز كوشى-قونعا قارسى ءىس-قيمىل سالاسىندا اقپارات الماسۋ ءتارتىبى رەتتەلدى، كوشى-قون زاڭناماسىن بۇزۋشىلاردى باسقا ەلدەرگە بەرۋ تۋرالى ماسەلە شەشىلدى. سونداي-اق شەتەلدىكتەردىڭ قازاقستاندا بولۋ مەرزىمدەرى رەتتەلدى. ۆەدومستۆونىڭ مالىمەتىنگە، قازىر كوشى-قون سالاسىنداعى تاعى 9 كەلىسىم (ارمەنيا، ۆەتنام، گرۋزيا، قحر، مولدوۆا، رەسەي، تۇركيا، ۋكراينا، فرانتسيا) كەلىسۋ مەن قارالۋ ۇستىندە.

 

سوڭعى جاڭالىقتار