30 قىركۇيەك, 19:44 513 0 ەكونوميكا انار لەپەسوۆا

قازاقستاندىق بانكتەر نەسيەنى قاشىقتان بەرە باستايدى

قازاقستان ۇلتتىق بانكى بيىلعى 1 قازاننان باستاپ قارجىلىق قىزمەتتەردى قاشىقتان الۋ ءۇشىن بيومەتريالىق سايكەستەندىرۋ سەرۆيسىن پايدالانادى.

بۇل سەرۆيس «بەت-الپەتتى تانۋ» تەحنولوگياسى ارقىلى قارجىلىق قىزمەتتى قاشىقتان الۋ مۇمكىندىگىن كوزدەيدى. ياعني قارجى ۇيىمىنا بارۋدىڭ قاجەتى جوق. كليەنتتەرگە بانك شوتتارى مەن دەپوزيتتەردى اشۋ، تولەم كارتوچكالارىن شىعارۋ، كرەديتتەۋ سياقتى قىزمەت تۇرلەرى كورسەتىلەدى.

«قاشىقتان بيومەتريالىق سايكەستەندىرۋدى ەنگىزۋ الەمدەگى كۇردەلى ەپيدەميولوگيالىق جاعدايدىڭ اياسىندا جاڭا قاۋىپ-قاتەرلەرگە جاۋاپ بەرەدى. سەرۆيستى قارجى قوعامداستىعىنىڭ پايدالانۋى حالىققا قاشىقتان كورسەتۋ تاسىلىمەن ۇسىنىلاتىن قىزمەتتەر ءتىزىمىن كەڭەيتەدى»، - دەدى قر ۇلتتىق بانكى توراعاسىنىڭ ورىنباسارى ەسجان ءبىرتانوۆ.

اتاپ وتىلگەندەي، اتالمىش سەرۆيس بانكتەرگە، ساقتاندىرۋ كومپانيالارىنا، باعالى قاعازدار نارىعىنىڭ كاسىبي قاتىسۋشىلارىنا، تولەم جانە ميكروقارجى ۇيىمدارىنا قولجەتىمدى.

«سەرۆيستى ۇلتتىق بانك قارجى نارىعىنا قاتىسۋشىلارمەن بىرلەسىپ ازىرلەدى. جۇيە بيىل ساۋىردە پيلوتتىق رەجيمدى ىسكە قوسىلدى. وسى ۋاقىت ىشىندە سەرۆيس ەكىنشى دەڭگەيدەگى 11 بانككە حالىققا 2,8 ملن بانك قىزمەتىن كورسەتۋگە مۇمكىندىك بەردى. قر ۇلتتىق بانكى ىسكە اسىراتىن قاشىقتان سايكەستەندىرۋ تەتىگى قازاقستاننىڭ قارجى سەكتورىن تسيفرلاندىرۋ جولىنداعى تاعى ءبىر قادام بولىپ تابىلادى. سداو سەرۆيسىنە قوسىلۋعا مۇددەلى بولعان جاعدايدا قارجى نارىعىنا قاتىسۋشىلار +7-7272-50-66-26 تەلەفونى بويىنشا قبەو-عا ءوتىنىش بەرە الادى»، - دەلىنگەن ۇلتتىق بانك اقپاراتىندا.

سوڭعى جاڭالىقتار