30 قىركۇيەك, 17:31 421 0 نۇر وتان انار لەپەسوۆا

اباي-175: باۋىرجان بايبەك ۇلى اقىننىڭ تۋعان جەرىندە اتقارىلىپ جاتقان ىستەرمەن تانىستى

قازاقتىڭ ۇلى اقىنى ابايدىڭ 175 جىلدىق مەرەيتويى اياسىندا ويشىلدىڭ تۋعان جەرىندە ىستەلىپ جاتقان جۇمىستاردى قاداعالاۋ ماقساتىندا "Nur Otan"  پارتياسى توراعاسىنىڭ ءبىرىنشى ورىنباسارى باۋىرجان بايبەك سەمەيگە باردى. 

«بارشاڭىزعا ءمالىم، بيىل دانا ابايدىڭ تۋعانىنا 175 جىل تولىپ وتىر. ۇلى ويشىلدىڭ مەرەيتويىن لايىقتى اتاپ ءوتۋ ماقساتىندا ەل پرەزيدەنتى قاسىم-جومارت توقاەۆ ارنايى جارلىق شىعارىپ، ونى قوعامدىق سانانى جاڭعىرتاتىن ەلدىك ءىس-شارا رەتىندە وتكىزۋدى، الاش قايراتكەرلەرى تۋ تىككەن سەمەي قالاسىن تاريحي ورتالىق رەتىندە بەلگىلەۋدى تاپسىردى.

قاشاندا ەلدىگىن باياندى، مەملەكەتتىلىگىن ماڭگىلىك ەتۋدى كوزدەيتىن ۇلتتار تاريحىنا بويلاپ، تۇعىرلى تۇلعالارىنىڭ اسىل ويلارىن ەل دامۋىنىڭ وزەگىنە اينالدىرادى. ەلباسى نۇرسۇلتان نازارباەۆتىڭ قولعا العان ىستەرىنىڭ تۇپكى ءتۇيىنى دە، «رۋحاني جاڭعىرۋ» باعدارلاماسى مەن «ۇلى دالانىڭ جەتى قىرى» ماقالاسى دا وسىناۋ ۇلى مۇراتتاردى كوزدەيدى.

الەمدى شارپىعان ىندەتكە قاراماستان، اقىن مەرەيتويىن اتاپ وتۋگە بايلانىستى ەلىمىزدە ءبىرشاما اۋقىمدى جۇمىستار اتقارىلدى.

مەملەكەت باسشىسىنىڭ تاپسىرمالارى اياسىندا حاكىم ابايدىڭ تۋعان جەرىندە ىستەلىپ جاتقان جۇمىستاردى قاداعالاۋ ماقساتىمەن بۇگىن سەمەي قالاسىنا ارنايى كەلدىم» - دەدى پارتيا توراعاسىنىڭ ءبىرىنشى ورىنباسارى.

باۋىرجان بايبەك شىعىس قازاقستان وبلىسىنىڭ اكىمى دانيال احمەتوۆپەن بىرگە شاھارداعى قايتا جوندەۋدەن وتكىزىلگەن اباي الاڭىندا، اباي اتىنداعى تەاتردا بولىپ، ارى قاراي جيدەبايعا اتتانعان. ۇلى ويشىلدىڭ رۋحىنا تاعزىم ەتىپ، اقىن ۇرپاقتارىمەن، ەل اعالارىمەن كەزدەستى.

«ەل جايى، رۋحانيات ماسەلەسى اڭگىمە ارقاۋىنا اينالىپ، بەلگىلى قالامگەر تولەگەن جانعاليەۆ اقساقال ەلباسى، نۇرسۇلتان نازارباەۆتىڭ دا ەل پرەزيدەنتى رەتىندەگى العاشقى قادامىن اباي ەلىنەن باستاعانىن، وسى جولدى بۇگىندە مەملەكەت باسشىسى قاسىم-جومارت توقاەۆ تا جالعاستىرعانىن ەسىنە الدى.

جالپى، ابايدىڭ 175 جىلدىعىن اتاپ ءوتۋ اياسىندا ۇلكەندى-كىشىلى 500-گە جۋىق ءىس-شارا جوسپارلانعان. تەك اباي اۋدانىنىڭ وزىندە عانا مەرەيتويدى ۇيىمداستىرۋ اياسىندا ىرگەلى جوبالار ىسكە اسىرىلعان. ابايدىڭ تۋعان جەرى – سىرت قاسقابۇلاقتا مەموريالدىق كەشەن بوي كوتەرگەن. ابايدىڭ اكەسى جەرلەنگەن اقشوقى مەكەنى اباتتاندىرىلىپ، قۇنانباي وسكەنبايۇلى مۇراجايى سالىندى. جيدەبايداعى «اباي - شاكارىم» كەشەنىنە، ابايدىڭ مۋزەي-ۇيىنە زاماناۋي تالاپتارعا ساي جوندەۋ جۇمىستارى جۇرگىزىلگەن.

ەلىمىزدىڭ وزگە ايماقتارى دا اباي مەرەيتويىنا ءوز ۇلەستەرىن قوسۋدا. ءوز كەزەگىندە «Nur Otan» پارتياسى مەن «Jas Otan» جاستار قاناتى دا وسى مەرەيتوي اياسىندا ەلىمىزدىڭ بارلىق وڭىرىندە 350-دەن استام ءىس-شارا وتكىزدى
ۇلى ابايدى ۇلىقتاۋ، مۇراسىن ناسيحاتتاۋ ءىسى ارى قاراي جالعاسا بەرەدى»، - دەپ جازدى Facebook-تەگى پاراقشاسىندا.

سوڭعى جاڭالىقتار