30 قىركۇيەك, 16:23 859 0 جاڭالىقتار انار لەپەسوۆا

اقتوبە وبلىسى اكىمىنىڭ بۇرىنعى ورىنباسارى 12 جىلعا سوتتالدى

نۇر-سۇلتان قالاسىنىڭ مامانداندىرىلعان اۋدانارالىق سوتىندا اقتوبە وبلىسى اكىمىنىڭ بۇرىنعى ورىنباسارى رۋسلان مامۋنوۆقا قاتىستى سوت ۇكىمى شىقتى.

ول قىلمىستىق كودەكستىڭ ءۇش بابى بويىنشا - الاياقتىق، قىلمىستىق جولمەن الىنعان اقشانى جانە (نەمەسە) وزگە دە مۇلىكتى جاريا ەتكەنى (جىلىستاتقانى) جانە پارا بەرۋگە يتەرمەلەگەنى ءۇشىن ايىپتالدى.

ەكس-شەنەۋنىك قوستانايدىڭ ەكس-اكىمى احمەدبەك احمەتجانوۆتىڭ تۋىستارىنان 1,2 ميلليون دوللاردى زاڭسىز العانى ءۇشىن كىنالى دەپ تانىلدى.

ايىپتاۋ قورىتىندىسىنا سايكەس، مامۋنوۆ بۇل اقشانى الىپ، 2016 جىلى اسا ءىرى مولشەردە پارا العانى ءۇشىن سوتتالعان احمەتجانوۆقا ۇكىمدى جەڭىلدەتۋ تۋرالى كەلىسىمگە ۋادە بەردى. الايدا مامۋنوۆ وعان قوستانايدىڭ بۇرىنعى اكىمىنىڭ ايەلى مەن اعاسى بەرگەن اقشانى نۇر-سۇلتاندا ەكى Lexus اۆتوكولىگى مەن 2 بولمەلى پاتەر ساتىپ الۋعا جۇمساعان.

نۇر-سۇلتان قالالىق سوتىنىڭ سۋدياسى ءادىلحان شايحيسلاموۆ: "رۋسلان مامۋنوۆ كىنالى دەپ تانىلىپ، وعان ورتاشا قاۋىپسىز كولونيادا جازاسىن وتەي وتىرىپ، 12 جىلعا باس بوستاندىعىنان ايىرۋ جازاسى تاعايىندالسىن",  - دەپ ۇكىمدى وقىدى.

 

 

سوڭعى جاڭالىقتار