30 قىركۇيەك, 12:32 666 0 زاڭ انار لەپەسوۆا

ءماجىلىس قوس ازاماتتىقپەن كۇرەسۋگە باعىتتالعان قۇجاتتى ماقۇلدادى

پارلامەنت ءماجىلىسىنىڭ جالپى وتىرىسىندا «قازاقستان ۇكىمەتى مەن بەلارۋس ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلداندى.

قازاقستان ۇكىمەتى مەن بەلارۋس ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىمگە 2019 جىلعى 25 قازاندا نۇر-سۇلتان قالاسىندا قول قويىلدى.

قۇجات اياسىندا تاراپتار كوشى-قون، ەكىنشى تاراپ مەملەكەتىنىڭ اۋماعىنداعى ءبىر تاراپ مەملەكەتى ازاماتتارىنىڭ قۇقىقتارىن قورعاۋ سالاسىنداعى ىنتىماقتاستىقتى، ونىڭ ىشىندە ءوز مەملەكەتتەرىنىڭ زاڭنامالارى مەن حالىقارالىق مىندەتتەمەلەرىنە سايكەس اقپاراتتىق ءوزارا ءىس-قيمىلدى جۇزەگە اسىرادى.

«بىرىنشىدەن، ستاتيستيكا مەن اقپارات الماسۋعا مۇمكىندىك بەرەدى. ەكىنشىدەن، ازاماتتار تۋرالى جەكە اقپارات الۋعا بولادى. ۇشىنشىدەن، ەكى ەل ۇكىمەتتەرى تاجىريبە الماسىپ، ءبىر-بىرىنە پراكتيكالىق كومەك كورسەتەدى»، - دەدى قر ىشكى ىستەر ءمينيسترى ەرلان تۇرعىمباەۆ.

سونىمەن قاتار، كەلىسىمدە كوشى-قون سالاسىنداعى قىلمىستارمەن كۇرەسۋگە قاتىستى قادامدار ەسكەرىلگەن. بەلارۋس پارلامەنتى كەلىسىمدى 2020 جىلعى 18 مامىردا بەكىتتى.

«جالپى، ىشكى ىستەر مينيسترلىگى كوشى-قون بويىنشا 23 حالىقارالىق كەلىسىمدى بەكىتتى. حالىقارالىق دەڭگەيدە تاعى دا 9 كەلىسىم دايىندالۋدا. وسى قۇجاتتاردىڭ ناتيجەسىندە زاڭسىز كوشى-قون بويىنشا اقپارات الماسۋ جولعا قويىلادى، ادامداردى باسقا ەلدەرگە قايتارۋ ماسەلەسىن شەشەدى. سونىمەن قاتار، شەتەلدىكتەردىڭ قازاقستاندا بولۋ مەرزىمى انىقتالادى ءارى قوس ازاماتتىققا جول بەرمەۋ تەتىكتەرىن قامتيدى»، - دەدى مينيستر.

 

سوڭعى جاڭالىقتار