30 قىركۇيەك, 09:29 320 0 جاھان انار لەپەسوۆا

COVID-19: نيدەرلاندتا جاڭا شەكتەۋلەر ەنگىزىلدى

نيدەرلاندتىڭ ءۇش قالاسىندا ەپيدەميولوگيالىق احۋال ۋشىقتى. كوروناۆيرۋس جۇقتىرۋ دەرەكتەرىنىڭ كۇرت كوبەيۋىنە بايلانىستى ەل بيلىگى جاڭا شەكتەۋلەر ەنگىزدى.  

نيدەرلاند پرەمەر-ءمينيسترى مارك ريۋتتەنىڭ ايتۋىنشا، ەلدە قىزىل ايماق قاتارىنا جاتاتىن وڭىرلەر سانى ارتىپ كەلەدى. ۆيرۋستىڭ تارالۋ قارقىنىن توقتاتۋ ءۇشىن ۇكىمەت بۇكىل مەملەكەت اۋماعىنا شەكتەۋ شارالارىن ەنگىزۋ تۋرالى شەشىم قابىلدادى.

اتاپ ايتقاندا، ەلدە مەيرامحانالار مەن كافە-بارلاردىڭ جۇمىس ۋاقىتى قىسقارادى. ال كەڭسە قىزمەتكەرلەرى قاشىقتان جۇمىس ىستەۋ رەجيمىنە كوشەدى. سونداي-اق، بارلىق سپورتتىق ءىس-شارا جانكۇيەرسىز ءوتۋى ءتيىس. اتالعان شەكتەۋلەر كەمىندە 3 اپتاعا سوزىلماق.

پاندەميا باستالعالى نيدەرلاندتا 118 مىڭنان استام ادام كوروناۆيرۋس جۇقتىرعان. قاتەرلى ۆيرۋستان 6,3 مىڭ ادام كوز جۇمدى.

ەسكە سالا كەتەيىك، بۇعان دەيىن ۇلىبريتانيادا شەكتەۋ شارالارى كۇشەيتىلگەنىن حابارلاعانبىز. جاڭا ەرەجە بويىنشا ەلدەگى مەيرامحانالار ساعات كەشكى ونعا دەيىن عانا جۇمىس ىستەيدى. بارلىق مەكەمە قىزمەتكەرلەرى بەتپەرتە تاعۋى ءتيىس. سونداي-اق ۇيلەنۋ تويلارىنا شاقىرۋعا رۇقسات ەتىلگەن قوناقتار سانى 15-تەن اسپاۋى ءتيىس. بۇعان دەيىن ۇلىبريتانيالىقتار توي-تومالاققا 30 ادامعا دەيىن شاقىرا الاتىن.

سوڭعى جاڭالىقتار