29 قىركۇيەك, 18:08 360 0 جاھان انار لەپەسوۆا

COVID-19: رەسەيلىك وقۋشىلار ەكى اپتالىق دەمالىسقا جىبەرىلەدى

كوروناۆيرۋس جۇقتىرۋ دەرەكتەرىنىڭ ارتۋىنا بايلانىستى رەسەيلىك وقۋشىلار ەكى اپتالىق دەمالىسقا جىبەرىلەدى. بۇل تۋرالى ماسكەۋ مەرى سەرگەي سوبيانين مالىمدەدى.

قالا باسشىسىنىڭ رەسمي سايتىندا جاريالانعان اقپاراتقا سۇيەنسەك، وقۋشىلار 5-18 قازان ارالىعىندا دەمالادى. ادەتتە رەسەي مەكتەپتەرىندە كۇز ايىنداعى دەمالىس ءبىر اپتاعا سوزىلاتىن.

18 قازانعا دەيىن قاشىقتان وقىتۋ دا توقتاتىلادى. قوسىمشا ءبىلىم بەرۋ مەكەمەلەرى دە ەكى اپتا جۇمىس ىستەمەيدى. ال بالاباقشالاردىڭ جۇمىس ۋاقىتى وزگەرمەيدى.

جەرگىلىكتى اقپارات قۇرالدارىنىڭ حابارلاۋىنشا، كوروناۆيرۋس ىندەتىن جۇقتىرعاندار سانىنىڭ كوبەيۋىنە بايلانىستى رەسەي ۇكىمەتى كارانتين شارالارىن ەنگىزۋ ماسەلەسىن قاراستىرۋدا. ەگەر ءبىر تاۋلىك ىشىندە 10 مىڭنان استام ادامنان ىندەت انىقتالسا جانە جاڭا ناۋقاستار سانى جازىلعانداردان كوپ بولسا، ەلدە كارانتين قايتا ەنگىزىلمەك.

وتكەن تاۋلىكتە رەسەيدە 8232 ادامنان كوروناۆيرۋس انىقتالدى. ال پاندەميا باستالعالى 1 167 805 ادام ىندەت جۇقتىردى. 952 399 ادام ەمدەلىپ شىقسا، دەرتى اسقىنعان 20 545 ناۋقاس قايتىس بولدى.

سوڭعى جاڭالىقتار