27 قىركۇيەك, 09:51 526 0 جاڭالىقتار اسىل تۇمار

اليمەنت تولەمەي جۇرگەن اكە پاتەرىن ساتىپ، قارىزىنان قۇتىلدى

قوستاناي وبلىسىنىڭ جىتىقارا اۋدانىندا بىرنەشە جىلدان بەرى بالاسىنا اليمەنت تولەمەگەن ازامات پاتەرىن ساتۋعا ءماجبۇر بولدى. بۇل جايىندا قوستاناي وبلىسى جەكە سوت ورىنداۋشىلارىنىڭ ايماقتىق پالاتاسى مالىمەت تاراتتى.

ەر ازامات بالاسىن اسىراپ-باعۋعا 1,5 ملن تەڭگە قارىز بولىپ قالعان.

«بۇرىن بۇل ىسپەن مەملەكەتتىك سوت ورىنداۋشى اينالىسقان بولاتىن، كەيىننەن شاعىمدانعان كەلىنشەك ءوز ارىزىن قايتارىپ الدى. ونىڭ بۇرىنعى كۇيەۋى اليمەنتتى ۋاقتىلى تولەپ تۇرۋعا ۋادەت ەتكەن، الايدا سوزىندە تۇرمادى. سوسىن ول بىزدەن كومەك سۇراپ كەلدى. مەن بىردەن جاۋاپكەردىڭ تۇراتىن جەرىن انىقتاپ، جۇمىس ىستەگەن جەرلەرىنە سۇراۋ سالىپ، جالاقىسىنىڭ قانشا ەكەنىن انىقتادىم. ءۇش جىلدا قارىز 1,5 ملن تەڭگەگە جەتكەن»، – دەيدى سوت ورىنداۋشى بوتاگوز يسمۋرزينا.

اۋدان تۇرعىنى ءبىراز ۋاقىت ۆاحتا ادىسىمەن جۇمىس ىستەگەن، قازىر جىتىقاراعا ورالىپ، التىن وندىرەتىن كومپانيادا ەڭبەك ەتىپ ءجۇر. ۇزاققا سوزىلعان اڭگىمەدەن كەيىن جاۋاپكەر ءوزىنىڭ پاتەرىن ساتىپ، قارىزىن تولىق جاباتىن بولىپ كەلىستى. ول دالادا قالمايدى، ۋاقىتشا اتا-اناسىنىڭ قولىندا تۇرادى. بالانىڭ اكەسى بۇدان بىلاي اليمەنتتى ۋاقىتىندا تولەپ تۇرۋعا ۋادە ەتتى.

«ءبىر عانا جىتىقارا اۋدانىندا اليمەنتكە قاتىستى 600 ءىس وندىرىستە جاتىر. ونىڭ ىشىندە پەرزەنتىنە اليمەنت تولەمەي قاشىپ جۇرگەن انالار دا بار. بىلتىر وسىنداي انانىڭ بىرەۋىن اكىمشىلىك جاۋاپكەرشىلىككە تارتتىق. ەكى بالا اكەسىمەن بىرگە تۇرادى. ال بيىل سول انا بالالارىنىڭ الدىنداعى قارىزىن وتەمەگەنى ءۇشىن ەندى قىلمىستىق جاۋاپقا تارتىلىپ، شارتتى جازاعا كەسىلدى. قوستاناي وبلىسىندا اليمەنت بويىنشا 13 500 ءىس قارالىپ جاتىر، اليمەنت قارىزى 100 ملن تەڭگەدەن اسىپ كەتكەن«، – دەيدى قوستاناي وبلىسى جەكە سوت ورىنداۋشىلارى ايماقتىق پالاتاسىنىڭ باسشىسى نەسىبەلى باسەنوۆا.

سوت ورىنداۋشىلارى مۇنداي ىستەردى قاراعاندا بورىشكەرلەرگە تۇسىنىستىكپەن قاراۋعا تىرىسادى. مىسالى بوتاگوز يسمۋرزينا تاياۋدا بالالارىنا 200 مىڭ تەڭگە قارىز بولعان اكەنىڭ جۇمىسقا ورنالاسۋىنا كومەكتەستى. سونىڭ ارقاسىندا ول ازامات ەكى ايدا بۇكىل قارىزىنان قۇتىلدى جانە ەكى قولعا ءبىر كۇرەك تاپتى.

 

سوڭعى جاڭالىقتار