24 قىركۇيەك, 18:44 417 0 ءبىلىم انار لەپەسوۆا

ەلىمىزدىڭ ۇزدىك ۇستازدارى انىقتالادى

«ۇزدىك پەداگوگ» اتاعىن بەرۋ بويىنشا رەسپۋبليكالىق كونكۋرستىق كوميسسيا جۇمىسىن باستادى. بۇل تۋرالى قر ءبىلىم جانە عىلىم ۆيتسە-ءمينيسترى شولپان كارينوۆا Facebook-تەگى جەكە پاراقشاسىندا جازدى.

بيىل «ۇزدىك پەداگوگ» كونكۋرسىنىڭ رەسپۋبليكالىق كەزەڭىنە 144 پەداگوگ ءوتىنىم بەردى. ونىڭ ىشىندە: مەكتەپكە دەيىنگى جانە ورتا ءبىلىم بويىنشا – 109, تەحنيكالىق جانە كاسىپتىك ءبىلىم بويىنشا – 35.

«ۇزدىك پەداگوگ» اتاعىنىڭ يەگەرلەرىن انىقتايتىن كونكۋرستىق كوميسسيا قۇرامىندا نۇر-سۇلتان قالاسىنىڭ اتا-انالار كوميتەتىنىڭ ءتورايىمى، «Kazakhstan Parents Union» قوعامدىق قورىنىڭ توراعاسى، قوعامدىق ماڭىزدى باستامالار قورىنىڭ «الەم مۇعالىمى – قازاقستاندا» جوباسىنىڭ ۇيلەستىرۋشىسى، «ADAL BILIM» سىبايلاس جەمقورلىققا قارسى ءىس-قيمىل جونىندەگى جوبالىق ءوفيسىنىڭ ساراپشىلارى، «سەرپىن» ۇلتتىق ءبىلىم جانە يننوۆاتسيا پالاتاسىنىڭ ديرەكتورى، «اتامەكەن» قر ۇكپ وكىلدەرى، سونداي-اق بۇقارالىق اقپارات قۇرالدارىنىڭ باسشىلارى، كاسىپوداق، مەملەكەتتىك جانە باسقا دا قوعامدىق ۇيىمداردىڭ وكىلدەرى بار.

«مۇعالىمدەر كۇنى قارساڭىندا كونكۋرس ناتيجەسى شىعارىلىپ، ەلىمىزدىڭ ۇزدىك پەداگوگتەرى انىقتالادى»، – دەدى ۆيتسە-مينيستر.

9 جىل ىشىندە «ۇزدىك پەداگوگ» كونكۋرسىنىڭ جەڭىمپازدارى بولعان مەكتەپكە دەيىنگى جانە ورتا ءبىلىم، تەحنيكالىق جانە كاسىپتىك ءبىلىم جۇيەسىنىڭ 432 پەداگوگىنە 1000 اەك اقشالاي سىياقى بەرىلگەنىن ايتا كەتكەن ءجون.

 

سوڭعى جاڭالىقتار