24 قىركۇيەك, 17:02 309 0 پرايمەريز انار لەپەسوۆا

اقمولا وبلىسىندا "پرايمەريز" جۇيەسىنە 36 مىڭعا جۋىق نۇروتاندىق تىركەلدى

اقمولا وبلىسى بويىنشا «پرايمەريز» اقپاراتتىق جۇيەسىنە 36 مىڭعا جۋىق نۇرتوتاندىق تىركەلدى. بۇل جالپى ءوڭىر بويىنشا پارتيا مۇشەلەرىنىڭ 96,4 پايىزىن قۇرايدى.

«Nur Otan» پارتياسىنىڭ جالپىرەسپۋبليكالىق ىشكى سايلاۋىندا داۋىس بەرۋگە ساناۋلى كۇندەر قالدى.

بۇعان دەيىن حابارلاعانىمىزدىي  ەلباسى، پارتيا توراعاسى نۇرسۇلتان نازارباەۆ، اۋدان اكىمدەرى دە «پرايمەريز» اقپاراتتىق جۇيەسىندە اۆتوريزاتسيالاۋ راسىمىنەن ءوتتى.

بۇعان دەيىن ايتىلعانداي، ەل تاريحىندا العاش رەت داۋىس بەرۋ ەلەكتروندىق تۇردە وتەدى. پارتيا مۇشەلەرى ءتۇرلى فورماتتاردى – ءموبيلدى قوسىمشانى، primaries.kz ۆەب-پورتالىن، ۋچاسكەدە ونلاين-داۋىس بەرۋدىڭ ءبىرىن تاڭداي الادى. سونداي-اق ينتەرنەتكە قول جەتىمدىلىگى جوق اۋدانداردا بيۋللەتەن ارقىلى داۋىس بەرۋگە بولادى. سايلاۋ پروتسەسىنىڭ اشىقتىعىن قامتاماسىز ەتۋ ءۇشىن «ءبىر داۋىس، ءبىر جسن، ءبىر ءموبيلدى ءنومىر جانە ءبىر IP-ادرەس» قاعيداتى بويىنشا ارنايى ۆەريفيكاتسيا جۇيەسى قولدانىلدى. داۋىس بەرۋگە ەكى رەت قاتىسۋ مۇمكىن ەمەس. بۇل جاعدايدا سايلاۋشى بىردەن بىرنەشە كانديداتقا داۋىس بەرە الادى.

اقمولا وبلىسى بويىنشا پرايمەريزگە قاتىسۋشىلارعا  774 ۇسىنىس پەن پىكىرلەر كەلىپ تۇسكەن. وبلىس بويىنشا تىركەلگەن 854 كانديدات 171 پىكىر سايىس الاڭىندا كەزدەسىپ، ءوزىنىڭ سايلاۋالدى باعدارلاماسىمەن تانىستىرىپ، كەلەلى ماسەلەلەردىڭ شەشىمىن ۇسىندى.

ايتا كەتەيىك، پرايمەريزدىڭ باستى ماقساتى – الداعى ءماجىلىس پەن بارلىق دەڭگەيدەگى ءماسليحاتتار سايلاۋىنا پارتيالىق تىزىمدەرگە ەنگىزۋ ءۇشىن قوعامنىڭ سەنىمى مەن قولداۋىنا يە بولعان بەدەلدى پارتيا كوشباسشىلارىن انىقتاۋ.

كانديداتتاردىڭ رەيتينگىسى بار پرايمەريزدىڭ قورىتىندىسى 5 قازاندا جاريالانادى دەپ كۇتىلۋدە.

سوڭعى جاڭالىقتار