24 قىركۇيەك, 17:34 416 0 ايماق انار لەپەسوۆا

قۇس تۇماۋى: 7 وبلىستا 220 مىڭنان استام قۇس قىرىلدى

ەلىمىزدىڭ تاعى ەكى وڭىرىندە قۇس تۇماۋى تىركەلدى. كەسەل تاراعان وبلىستاردىڭ سانى جەتىگە جەتتى. 

اۋىل شارۋاشىلىعى مينيسترلىگىنىڭ دەرەگىنشە، اقمولا وبلىسىندا – 703 قۇس، جامبىل وبلىسىندا – 238 قۇس (سوڭعى تاۋلىكتە 6 قۇس), قاراعاندى وبلىسىندا – 102 قۇس (سوڭعى تاۋلىكتە 12 قۇس), قوستاناي وبلىسىندا – 111 785, پاۆلودار وبلىسىندا  – 2 753 قۇس، سولتۇستىك قازاقستان وبلىسىندا  – 107 655, تۇركىستان وبلىسىندا 273 قۇس (سوڭعى تاۋلىكتە 196) قىرىلعان. بارلىعى جەكە اۋلالاردا 20 مىڭ قۇس جانە  ەكى قۇس فابريكاسىندا 203 مىڭ قۇس قىرىلعانى بەلگىلى بولدى(«بەسكول قۇس فابريكاسى» جشس – 93 849 باس، «اگروينتەرپتيتسا» – 109 567 باس). 

جانۋارلاردىڭ اسا قاۋىپتى اۋرۋلارىنىڭ الدىن الۋ بويىنشا 2020 جىلعا بەكىتىلگەن ۆەتەريناريالىق ءىس-شارالار جوسپارىنا سايكەس، جىل باسىنان بەرى ەل وڭىرلەرىنە قۇس تۇماۋىنا قارسى ۆاكتسينالاردىڭ 3 377 900 دوزاسى تاراتىلعان. قۇس تۇماۋىنىڭ تىركەلۋىنە بايلانىستى رەسپۋبليكالىق قوردان قوسىمشا 1 359 148 دوزا ۆاكتسينا ءبولىندى (سقو - 873 مىڭ دوزا، قوستاناي وبلىسىنا – 21 مىڭ، پاۆلودار وبلىسى – 465 مىڭ دوزا) ءبولىندى. سونداي-اق، 2020 جىلدىڭ 22-23 قىركۇيەگىندە كەسەل انىقتالعان ايماقتارعا قوسىمشا 1 015 518 ۆاكتسينا بەرىلدى.

ەسكە سالا كەتەيىك، بۇعان دەيىن قوستاناي وبلىسىندا ءۇش اۋدان قۇس تۇماۋىنىڭ تارالۋىنا بايلانىستى كارانتينگە جابىلعانىن حابارلاعانبىز. اتاپ ايتقاندا، ، سارىكول، ۇزىنكول جانە مەڭدىقارا اۋداندارىندا قۇستار قىرىلۋدا.

اۋىل شارۋاشىلىعى مينيسترلىگىنىڭ مالىمدەۋىنشە, ەلىمىزدە قۇس تۇماۋىن سولتۇستىكتەن وڭتۇستىككە كوشىپ بارا جاتقان جابايى قۇستار ورشىتكەن. اۋرۋ ورتاق سۋ قويماسىن پايدالانۋدان كەلگەن.

سوڭعى جاڭالىقتار