24 قىركۇيەك, 16:07 11361 0 جاھان انار لەپەسوۆا

تاعى ءبىر ەل لۋكاشەنكونى بەلارۋس باسشىسى رەتىندە مويىنداۋدان باس تارتتى

تاعى ءبىر مەملەكەت الەكساندر لۋكاشەنكونى بەلارۋس پرەزيدەنتى رەتىندە مويىنداۋدان باس تارتتى. بۇل تۋرالى كانادانىڭ سىرتقى ىستەر ءمينيسترى فرانسۋا-فيليپپ شامپان Twitter-دە مالىمدەدى.

«كانادا لۋكاشەنكونىڭ جاسىرىن وتكىزىلگەن ۇلىقتاۋ راسىمىنە قاتىستى وكىنىش بىلدىرەدى. ول دەموكراتيالىق جولمەن سايلانعان كوشباسشى ەمەس. كانادا اشىق ءارى ءادىل سايلاۋ وتكىزۋگە شاقىرادى. ءبىز حالىقارالىق ارىپتەستەرىمىزبەن بىرگە وسى ماقساتتا بىرىكپەكپىز»، — دەپ جازدى مينيستر.

سونداي-اق، ول بەلارۋس پرەزيدەنتتىگىنە ۇمىتكەر بولعان سۆەتلانا تيحانوۆسكايامەن تەلەفون ارقىلى سويلەسىپ، ەلدەگى سوڭعى جاعدايدى تالقىلاعانىن جەتكىزدى.

ەۋرووداق مەملەكەتتەرى ىشىندە سلوۆاكيا ءبىرىنشى بولىپ لۋكاشەنكونى بەلارۋستتىڭ زاڭدى پرەزيدەنتى رەتىندە مويىنداۋدان باس تارتتى. سونىمەن قاتار، گەرمانيا ۇكىمەتىنىڭ وكىلى شتەففەن زايبەرت الەكساندر لۋكاشەنكونىڭ دەموكراتيالىق لەگيتيمدىلىككە قول جەتكىزە المايتىنىن ايتتى. اقش پەن ۋكراينا دا وسىنداي پىكىردە.

ەسكە سالا كەتەيىك، كەشە بەلارۋستا الەكساندر لۋكاشەنكونى ۇلىقتاۋ ءراسىمى ءوتتى. بەلارۋس تىلىندە انت قابىلداعان ول پرەزيدەنت كۋالىگىن الىپ، قىزمەتىنە رەسمي تۇردە كىرىستى.

سوڭعى جاڭالىقتار