24 قىركۇيەك, 15:40 575 0 اتاجۇرت باقىتبەك قادىر

قانداستار تۇركىستاندا باس قوستى

دۇنيەجۇزى قازاقتارىنىڭ قاۋىمداستىعى مەن «وتانداستار قورى» جانە «Nur Otan» پارتياسىنىڭ قولداۋىمەن «جاس قازاق» حالىقارالىق جاستار ۇيىمىمەن بىرلەسىپ ءۇشىنشى رەت قازاقستاننىڭ كيەلى جەرلەرىنە ساياحات ۇيىمداستىرىلدى. ايتۋلى ءىس-شارا «كيەلى قازاقستان» جوباسى اياسىندا جۇزەگە استى. سوڭعى جىلدارى شەتەلدەگى قازاق جاستارىمەن بايلانىس ورناتىلىپ، جۇيەلى جۇمىس ءبىر ارناعا ءتۇستى.
جوبانىڭ باستى ماقساتى – قانداستارىمىزدى قازاقستاننىڭ كيەلى جەرلەرىمەن تانىستىرىپ، قانداستاردى قولداۋعا ارنالعان ءتۇرلى باعدارلامالار تۋرالى اقپارات بەرىپ، «رۋحاني جاڭعىرۋ» باعدارلاماسى شەڭبەرىندە ءبىلىم، مادەني-گۋمانيتارلىق مۇمكىندىكتەر جونىندە مالىمەت جەتكىزىپ، بولاشاقتا جيىنعا قاتىسقان ەتنيكالىق قازاق جاستارىمەن بىرلەسىپ جۇمىس ىستەۋگە، قارىم-قاتىناستى نىعايتۋعا جول اشۋ.
الەمگە تارالعان پاندەميا سالدارىنان بيىل شەتەلدەن قانداس جاستار كەلە المادى. سول ءۇشىن «كيەلى قازاقستان» جوباسىنا ەلىمىزدىڭ جوعارعى وقۋ ورىندارىندا وقىپ جاتقان ستۋدەنت جاستار قاتىستى. كورشىلەس الىس-جاقىن شەتەلدەن كەلگەن 20 جاس تۇركىستان وبلىسى مەن شىمكەنت قالاسىنا ساياحاتتادى.
يگىلىكتى شارا ەكى كۇنگە جوسپارلاندى. العاشقى كۇنى «قانداس جاستارمەن – بولاشاققا» اتتى دوڭگەلەك ۇستەل ۇيىمداستىرىلىپ، شاراعا قاتىسۋشىلار اتقارىلىپ جاتقان جوبالارمەن تانىسىپ، ويلارىن ءبىلدىردى. شىمكەنت قالاسىنداعى كورىكتى جەرلەردى تاماشالاپ، سايرام تاريحىمەن تانىستى.
ەكىنشى كۇنى قاتىسۋشىلار كيەلى تۇركىستان قالاسىنا بارىپ تاريحي ورىنداردى ارالاپ كوردى. شارا سوڭىندا جاستارعا «الەم قازاقتارى» دەگەن كىتاپ پەن باعالى سىيلىقتار تابىس ەتىلدى.

سوڭعى جاڭالىقتار