24 قىركۇيەك, 09:20 663 0 كولىك انار لەپەسوۆا

ەلوردا اۆتوبۋستارىنداعى ەلەكتروندى بيلەتتەۋ جۇيەسى 6 ملرد تەڭگەنى كولەڭكەلى اينالىمنان شىعاردى

نۇر-سۇلتان قالاسىنداعى قوعامدىق كولىكتەردى ەلەكتروندى ەسەپ ايىرىسۋ جۇيەسىنە تولىق كوشىرۋ ارقاسىندا 6 ملرد تەڭگە كولەڭكەلى اينالىمنان شىعارىلعان. بۇل تۋرالى قالا اكىمى التاي كولگىنوۆ مالىمدەدى.

«بۇگىن Kazan Digital Week حالىقارالىق فورۋمىنا ونلاين قاتىستىم. باسقا ەلدەردەگى ارىپتەستەرمەن بىرگە ينتەللەكتۋال ترانسپورت جۇيەلەرىن تالقىلاپ، تاجىريبەمىزبەن بولىستىك. قوعامدىق تاسىمالدىڭ مودەرنيزاتسياسى مەن تسيفرلانۋى - باسىم باعىتتاردىڭ ءبىرى. اۆتوبۋستاردى جاڭارتىپ قانا قويماي، جاڭا مارشرۋتتار قوسىپ، جول سالىپ، قالالىقتاردىڭ ىڭعايى ءۇشىن ەلەكتروندى قارىم-قاتىناس مەحانيزمدەرىن ەنگىزۋ كەرەك»، -  دەپ جازدى قالا اكىمى  Instagram پاراقشاسىندا.

التاي كولگىنوۆ ەلورداداعى كولىك تاسىمالىن دامىتۋ ماقساتىندا قولعا الىنعان شارالارعا توقتالدى.

«ءبىرىنشى - ينتەللەكتۋال ترانسپورت جۇيەسىن دامىتۋ. كوشە قيىلىستارىندا تۇرعان باعدارشامداردىڭ 50% اداپتيۆ باسقارۋ جۇيەسىمەن قامتىلعان. مۇنداي تەحنولوگيا كولىك اعىنىن اۆتوماتتى رەجيمدە ەسەپتەپ، باعىتتار بويىنشا شەشىم قابىلدايدى. بۇل كولىك اعىنىنىڭ جىلدامدىعىن ارتتىرىپ، جولدا جوعالاتىن ورتاشا ۋاقىتتى 20% قىسقارتۋعا مۇمكىندىك بەردى. جىل سوڭىنا دەيىن قالاداعى كوشە قيىلىستارىنىڭ 80% وسى تسيفرلى جۇيەمەن قامتيتىن بولامىز. بۇل - تاۋلىكتىڭ قاربالاس ۋاقىتىندا ءتۇيىندى باعىتتارعا جۇكتەمەنى ازايتادى. ەكىنشى - قاۋىپسىزدىكتى قامتاماسىز ەتۋ. باقىلاۋ كامەرالارى جول-كولىك وقيعالارىن 20% قىسقارتىپ، ولىمگە اكەپ سوعاتىن جاعدايلاردى 40% ازايتۋعا مۇمكىندىك بەردى. ءۇشىنشى - قوعامدىق تاسىمالدى دامىتۋ. قالالىقتاردىڭ ىڭعايى ءۇشىن قالاماڭى كولىك قاتىناسىن ەنگىزدىك (32 ەلدىمەكەنگە قىزمەت كورسەتىلەدى), ەكسپرەسس ، sport shuttle bus مارشرۋتتار دا بار (بۇقارالىق مادەني شارالار ءۇشىن)»، - دەپ جازدى شاھار باسشىسى.

سونداي-اق، قالا اكىمى شاھاردا تۇرعىنداردىڭ ءوتىنىشى بويىنشا 40 مارشرۋت وڭتايلاندىرىلعانىن، قوعامدىق كولىكتىڭ 70% استامىن جاڭارتىلىپ، جىل باسىندا كوشەلەرگە 100 جاڭا ەلەكتر اۆتوبۋس شىققانىن اتاپ ءوتتى. اكىمدىك جىل سوڭىنا دەيىن ەلەكتر اۆتوبۋستاردىڭ تاعى ءبىر پارتياسىن شىعارۋدى جوسپاراپ وتىر ەكەن.

«بارلىق اۆتوبۋس جولاقى تولەۋدىڭ ەلەكتروندى جۇيەسىمەن جابدىقتالعان، بۇل كارانتين كەزەڭىندە ىندەت جۇقتىرۋ ىقتيمالدىعىن ازايتتى. ەلەكتروندى ەسەپ ايىرىسۋعا 100% ءوتۋدىڭ ارقاسىندا 6 ملرد تەڭگە كولەڭكەلى اينالىمنان شىعارىلدى. سونىمەن بىرگە، قالالىقتار اۆتوبۋستاردىڭ قاي جەردە كەلە جاتقانىن موبيل قوسىمشا ارقىلى قاراپ، ايالدامالارداعى ەلەكتروندى تابلولاردان كورە الادى»، - دەيدى التاي كولگىنوۆ.

 

سوڭعى جاڭالىقتار