23 قىركۇيەك, 21:26 1333 0 جاھان انار لەپەسوۆا

بەلارۋستا الەكساندر لۋكاشەنكونى ۇلىقتاۋ ءراسىمى ءوتتى

بەلارۋستىڭ تاۋەلسىزدىك سارايىندا الەكساندر لۋكاشەنكونى ۇلىقتاۋ ءراسىمى ءوتتى، دەپ حابارلايدى بەلتا.

پرەزيدەنتتى ۇلىقتاۋ راسىمىنە جوعارى لاۋازىمدى تۇلعالار، وكىلدەر پالاتاسىنىڭ دەپۋتاتتارى مەن رەسپۋبليكا كەڭەسىنىڭ مۇشەلەرى، مەملەكەتتىك ورگاندار مەن ۇيىمدار، جەرگىلىكتى اتقارۋشى جانە ۇيلەستىرۋشى ورگاندار، رەسپۋبليكالىق بۇقارالىق اقپارات قۇرالدارىنىڭ باسشىلارى، عىلىم، مادەنيەت جانە سپورت قايراتكەرلەرى قاتىستى.

ەل كونستيتۋتسياسىنا وڭ قولىن قويعان الەكساندر لۋكاشەنكو بەلارۋس تىلىندە انت بەردى. انت قابىلداۋ تۋرالى اكتىگە قولى قويىلعان سوڭ، بەلارۋس ورتالىق سايلاۋ جانە رەسپۋبليكالىق رەفەرەندۋمداردى وتكىزۋ كوميسسياسىنىڭ توراعاسى ليديا ەرموشينا ا.لۋكاشەنكوعا بەلارۋس رەسپۋبليكاسى پرەزيدەنتىنىڭ كۋالىگىن تابىستادى.

ەسكە سالا كەتەيىك، بەلارۋستا پرەزيدەنت سايلاۋى 9 تامىزدا ءوتتى. سايلاۋ قورىتىندىسى بويىنشا الەكساندر لۋكاشەنكو 80,1 پايىزى داۋىسىن جينادى. الايدا سايلاۋدان كەيىن ەل استاناسى مەن ايماقتارىندا نارازىلىق اكتسيالارى باستالىپ، سايلاۋ ناتيجەلەرىنىڭ ادىلدىگىنە سەنبەيتىندەر لۋكاشەنكونىڭ وتستاۆكاعا كەتۋىن تالاپ ەتتى.

 

سوڭعى جاڭالىقتار