31 ناۋرىز 2015, 14:03 3305 0 ساياسات ەركەجان جۇماتاي

يسلام كارىموۆ قايتادان وزبەكستان پرەزيدەنتى اتاندى

بيىلعى جىل ساياسي ساحنادا سايلاۋ ناۋقانىمەن ەستە قالاتىن بولدى. كۇنى-كەشە كورشىمىز وزبەكستان رەسپۋبليكاسىندا پرەزيدەنت سايلاۋى بولىپ ءوتتى. الدىن-الا بولجامدار مەن قورىتىندىلار انىقتالماسا دا، حالىقتىڭ باسىم كوپشىلىگىنىڭ كىمگە داۋىس بەرەتىندىگى بەلگىلى بولدى دەيدى ساياساتكەرلەر. جالپى ساياسي ناۋقاننىڭ ءوتۋ بارىسىنا ەلدىڭ ورتالىق سايلاۋ كوميسسياسى وڭ باعا بەرىپ وتىر. ويتكەنى، سايلاۋ باستالعان سوڭ، 4 ساعاتتىڭ ىشىندە داۋىس بەرۋشىلەردىڭ 37%-ى، ياعني 7 جارىم ملن-نان استام ادام ءوز تاڭداۋىن جاساپ ۇلگەرگەن.

ايتا كەتەيىك، بۇل سايلاۋدا بيلىك باسىنداعى يسلام كارىموۆپەن باسەكەلەس رەتىندە حالىقتىق-دەموكراتيالىق پارتيا ورتالىق كەڭەسىنىڭ توراعاسى حاتامجان كەتمونوۆ باق سىنادى. ولاردان وزگە تاعى ەكى ۇمىتكەر، «ميللي تيكلانيش» دەموكراتيالىق پارتياسى فراكتسياسىنىڭ مۇشەسى اكمال سايدوۆ پەن «ادولات» سوتسيال-دەموكراتيالىق پارتياسى اتقارۋشى كوميتەتىنىڭ توراعاسى ناريمون ۋماروۆ تا ساياسي دوداعا قاتىستى.

رەيتەرس اگەنتتىگى ەلدىڭ ورتالىق سايلاۋ كوميسسياسىنا سىلتەمە جاساپ، داۋىس بەرۋشىلەردىڭ رەكوردتتىق سانى، ياعني 19 ميلليون سايلاۋشىنىڭ 90 پايىزدان استامى يسلام كارىموۆكە داۋىس بەرگەندىگىن حابارلايدى. كەزەكتى جەڭىسىنە دەيىن كارىموۆ وزبەكستاندى 26 جىل قاتارىنان باسقاردى. قازىر ونىڭ جاسى 77-دە. وزبەكستان كونستيتۋتسياسىنا 2011 جىلى ەنگىزىلگەن وزگەرىستەرگە سايكەس، ەلدە پرەزيدەنتتىك مەرزىم 7 جىلدان 5 جىلعا قىسقارعان-دى. سايلاۋ قورىتىندىسى بەلگىلى بولعان سوڭ، قازاقستان باسشىسى نۇرسۇلتان نازارباەۆ يسلام كارىموۆتى وزبەكستان پرەزيدەنتى بولىپ قايتا سايلانۋىمەن قۇتتىقتادى. «مەملەكەت باسشىسى ءوز قۇتتىقتاۋىندا وزبەك ەلى كارىموۆپەن بىرگە دامۋدىڭ داڭعىل جولىن جالعاستىرارىنا سەنىم ءبىلدىردى»، - دەپ اقوردانىڭ ءباسپاسوز قىزمەتى حابارلادى.

سوڭعى جاڭالىقتار