23 قىركۇيەك, 15:41 565 0 ءوندىرىس انار لەپەسوۆا

قازاقستاندا ونەركاسىپتى دامىتۋ قورى قۇرىلدى

ەلىمىزدە مەملەكەت باسشىسىنىڭ تاپسىرماسىنا سايكەس «ونەركاسىپتى دامىتۋ قورى» اق قۇرىلدى. بۇل تۋرالى قر يندۋستريا جانە ينفراقۇرىلىمدىق دامۋ مينيسترلگىنىڭ ءباسپاسوز قىزمەتى حابارلادى. 

قور يندۋستريالىق دامۋ جانە نۇرلى جول مەملەكەتتىك باعدارلامالارىنىڭ قارجى وپەراتورى -«قدب-ليزينگ» اق بازاسىندا قۇرىلدى.

مەملەكەت باسشىسى 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا اتاپ وتكەندەي، ەلىمىزدىڭ الدىندا تۇرعان ماڭىزدى مىندەت - ونەركاسىپتىك الەۋەتتى بارىنشا دامىتۋ. ۇكىمەت الدىنا ىشكى جانە سىرتقى نارىقتاردا وڭدەۋ ونەركاسىبى كاسىپورىندارىنىڭ باسەكەگە قابىلەتتىلىگىن ارتتىرۋ بويىنشا مىندەتتەر قويىلدى.

سونىمەن قاتار مەملەكەت باسشىسى وڭدەۋ ونەركاسىبىنىڭ ءوندىرىسىن بەس جىل ىشىندە كەم دەگەندە 1,5 ەسە ارتتىرۋدى تاپسىردى. يندۋستريا جانە ينفراقۇرىلىمدىق دامۋ مينيسترلىگى قدب-ليزينگىمەن بىرلەسىپ وڭدەۋ ونەركاسىبىنىڭ وتاندىق كاسىپورىندارىن جاڭعىرتۋ جانە وتاندىق ءوندىرىس تاۋارلارىنا سۇرانىستى ىنتالاندىرۋ جونىندەگى باعدارلامالاردى ىسكە اسىرۋدا.

قوردى قۇرۋ وڭدەۋشى ونەركاسىپتىڭ وتاندىق كاسىپورىندارىن مەملەكەتتىك قولداۋ شارالارىن كەڭەيتۋگە مۇمكىندىك بەرەدى. قور وتاندىق كاسىپورىنداردى 3% - دان اسپايتىن مولشەرلەمە بويىنشا قولجەتىمدى قارجىلاندىرۋدى قامتاماسىز ەتۋگە باعىتتالاتىن بولادى.

قور قىزمەتىنىڭ نەگىزگى باسىمدىعى اعىمداعى جىلدىڭ قىركۇيەگىندە مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا قويىلعان مىندەتتەر شەڭبەرىندە ستراتەگيالىق ينۆەستيتسيالىق جوبالاردى ىسكە اسىرۋ بولادى.

 

سوڭعى جاڭالىقتار