23 قىركۇيەك, 10:34 452 0 ءبىلىم ءدىلدا ۋاليبەك

قىزدار ۋنيۆەرسيتەتى شىعىس ەۋروپا ەلدەرىنىڭ حالىقارالىق رەيتينگىنە كىردى

قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا حالىق الدىندا ەسەپ بەرۋ كەزدەسۋىن وتكىزدى. بۇل تۋرالى وقۋ ورنىنىڭ ءباسپاسوز قىزمەتى حابارلادى.

جيىن تىكەلەي ەفيردە Zoom پلاتفورماسى مەن وقۋ ورنىنىڭ الەۋمەتتىك جەلىدەگى رەسمي پاراقشالارىندا ۇيىمداستىرىلدى. ءۇش ساعاتقا سوزىلعان كەزدەسۋدە ۋنيۆەرسيتەت باسشىسى وتكەن وقۋ جىلىندا اتقارىلعان جۇمىستاردى جان-جاقتى بايانداپ، الداعى جوسپارىمەن ءبولىستى.

«75 جىل بويى ەلىمىزدىڭ ءبىلىم بەرۋ جۇيەسى ءۇشىن 60 مىڭنان استام مامان دايارلاعان قازاقستاننىڭ جەتەكشى پەداگوگيكالىق جوعارى وقۋ ورىندارىنىڭ ءبىرى – قازاق ۇلتتىق قىزدار پەداگوگيكالىق ۋنيۆەرسيتەتى ءۇشىن 2019-2020 وقۋ جىلى ۇلتتىق ۋنيۆەرسيتەت مارتەبەسىندەگى دامۋ كەزەڭىمەن جانە ەلدەگى توتەنشە جاعدايعا بايلانىستى ەنگىزىلگەن شەكتەۋ شارالارىمەن تۇسپا-تۇس كەلدى. وتكەن وقۋ جىلىنىڭ ەكىنشى جارتىجىلدىعىندا كەزدەسكەن قيىندىقتارعا قاراماستان، ۋنيۆەرسيتەتتىڭ اكادەميالىق ساياساتىنا سايكەس ءبىلىم الۋشىلار مەن پروفەسسور-وقىتۋشىلىق قۇرام الدىنداعى مىندەتتەمەلەرىن تولىق ورىندادى»، – دەدى گاۋحار الدامبەرگەنوۆا.

وسى ۋاقىت شەڭبەرىندە ۋنيۆەرسيتەت ۇجىمى ءبىلىم بەرۋ ساپاسىن ارتتىرۋ، عىلىم جۇيەنى جەتىلدىرۋ، حالىقارالىق ىنتىماقتاستىق، تاربيە، تۇلعانىڭ كاسىبي قالىپتاسۋى، ينفراقۇرىلىمدى دامىتۋ، كادرلىق الەۋەتتى جاقسارتۋ بويىنشا ۇلكەن جۇمىس اتقاردى.

اتاپ ايتقاندا، قىزدار ۋنيۆەرسيتەتى العاش رەت شىعىس ەۋروپا جانە ورتالىق ازيا ەلدەرىنىڭ QS 301 - 350 حالىقارالىق رەيتينگىنە كىردى. ARES جوعارى وقۋ ورىندارىنىڭ حالىقارالىق رەيتينگىندە قازاقستاننىڭ 130 جوعارى وقۋ ورنى اراسىندا 29-شى ورىنعا يە بولدى.

سونىمەن قاتار  ۇلتتىق ينستيتۋتسيونالدىق رەيتينگتە ۋنيۆەرسيتەت جوو-نىڭ وندىعىنا جانە قازاقستاننىڭ ۇزدىك 3 پەداگوگيكالىق جوو-نىڭ قاتارىنا ەندى. 13 ءبىلىم بەرۋ باعدارلاماسى بويىنشا ۋنيۆەرسيتەت «اتامەكەن» ۇلتتىق كاسىپكەرلىك پالاتاسى رەيتينگىندەگى جوعارى وقۋ ورىندارىنىڭ العاشقى وندىعىنا تابان تىرەدى.

«2019 جىلدان باستاپ قازاقستاننىڭ جوعارى وقۋ ورىندارىنا بەرىلگەن اكادەميالىق ەركىندىك شەڭبەرىندە ۋنيۆەرسيتەت جۇمىس بەرۋشىلەرمەن بەلسەندى ىنتىماقتاستىق ورناتىپ، ولاردى ءبىلىم بەرۋ باعدارلامالارىن جوبالاۋ مەن جەتىلدىرۋ جۇمىستارىنا قاتىستىردى. ءبىلىم بەرۋ باعدارلامالارىنا ەنگىزىلگەن بارلىق وزگەرىستەر ەڭبەك نارىعىنىڭ سۇرانىسى مەن قازىرگى زامان قويعان تالاپتارعا سايكەستىگىنە قاراي ساراپتامادان ءوتتى»، – دەپ اتاپ ءوتتى قىزۇپۋ رەكتورى.

ونىڭ مالىمەتىنشە، بيىل ۋنيۆەرسيتەتتى 1889 تۇلەك ءبىتىرىپ، ونىڭ 82 پايىزى جۇمىسقا ورنالاستى. ول ەلەكتروندىق ۇكىمەت پورتالى ارقىلى جۇزەگە اسىرىلدى. قىزداردىڭ كوپشىلىگى ءوز ايماقتارىنا ورالىپ، جۇمىس ىستەۋدە. گاۋحار الدامبەرگەنوۆانىڭ ايتۋىنشا، بىتىرۋشىلەردى ءوز مامانداعىنا سايكەس جۇمىسقا ورنالاستىرۋ ءۇشىن ۋنيۆەرسيتەت وڭىرلىك باسقارمالارمەن، ءبىلىم بولىمدەرىمەن، مەكتەپكە دەيىنگى جانە ورتا ءبىلىم بەرۋ ۇيىمدارىمەن تىكەلەي كەلىسىمشارتتار جاساعان.

ەسەپ بەرۋ كەزدەسۋدە قىزۇپۋ رەكتورى عىلىمي الەۋەتتى ارتتىرۋ باعىتىندا اتقارىلىپ جاتقان جۇمىستارعا دا شولۋ جاسادى.

«عىلىمي-زەرتتەۋ جۇمىستارى 14 زەرتحانا مەن ورتالىقتاردا جۇزەگە اسادى. ونىڭ ىشىندە كەشەندى حيميا-بيولوگيالىق عزو، بيوحيميا جانە بيوتەحنولوگيا زەرتحاناسى، پوليمەرازدى تىزبەكتى رەاكتسيا زەرتحاناسى، گەواقپاراتتىق جۇيەلەر زەرتحاناسى، لاتىن گرافيكاسى ورتالىعى، روبوتوتەحنيكا ورتالىعى، «دارا» تۇزەتۋ ورتالىعى، ينكليۋزيۆتى ءبىلىم بەرۋدى قولداۋ رەسۋرستىق-كەڭەس بەرۋ ورتالىعى، «جان شۋاعى» پسيحولوگيالىق قولداۋ ورتالىعى، سونداي-اق الەۋمەتتىك جانە گەندەرلىك زەرتتەۋلەر عىلىمي-زەرتتەۋ ينستيتۋتى قىزمەت اتقارادى. وقۋ ورنىندا عىلىمي كادرلاردى دايارلاۋدى كۇشەيتۋ ماقساتىندا حيميا جانە بيولوگيا عىلىمدارى بويىنشا جاڭا ديسسەرتاتسيالىق كەڭەستەر اشىلدى»، – دەپ اتاپ ءوتتى گاۋحار الدامبەرگەنوۆا.

ۋنيۆەرسيتەتتە شەتەلدىك جوعارى وقۋ ورىندارىمەن 60-تان استام حالىقارالىق شارت بار. ونىڭ ىشىندە 2019-2020 وقۋ جىلىندا 10 ءوزارا كەلىسىم جاسالعان. قىزپۋ تۇركيانىڭ نيدە ومەر حاليسدەمير ۋنيۆەرسيتەتىمەن، اقش-تىڭ ميسسيسيپي القابىنىڭ مەملەكەتتىك ۋنيۆەرسيتەتىمەن، پولشانىڭ سيلەزيا ۋنيۆەرسيتەتىمەن، لوندوننىڭ باتىس حالىقارالىق كوللەدجىمەن قوس ديپلومدى ءبىلىم بەرۋ باعدارلامالارىن ىسكە اسىرۋدا. 2019-2020 وقۋ جىلىندا سىرتقى شىعىس اكادەميالىق ۇتقىرلىق باعدارلاماسى اياسىندا 48 ءبىلىم الۋشى شەتەلدىك سەرىكتەس جوعارى وقۋ ورىندارىنا وقۋعا جىبەرىلدى.

ۋنيۆەرسيتەت بازاسىندا 3 وقۋ-زەرتحانالىق عيمارات، 7 جاتاقحانا، باسكەتبول، ۆولەيبول، گاندبول، ميني-فۋتبول جانە بادمينتون الاڭدارى، جاتتىعۋ زالدارى، «اققۋ» ءجۇزۋ باسسەينى، «ۇلپان» اسحاناسى بار. بارلىق جاتاقحانالاردا فيتنەز زالدارى مەن سۇلۋلىق سالوندارى جۇمىس ىستەيدى.

 

سوڭعى جاڭالىقتار