21 قىركۇيەك, 17:16 687 0 ايماق انار لەپەسوۆا

تۇركىستاندىقتاردى بوپسالاعان "بلوگەرلەر" ۇستالدى

تۇركىستان وبلىسىندا وزگەلەردى بلوگەرلەر بولىپ بوپسالاعان ۇيىمداسقان قىلمىستىق توپتىڭ مۇشەلەرى سوتتالدى. ولار 6 اي كولەمىندە جەتىساي جانە ماقتاارال اۋداندارىنىڭ اۋماعىندا بوپسالاۋ مەن الاياقتىق ارقىلى 17 جەكە ادامنىڭ اقشاسىن يەمدەنگەن.

وبلىستىق پد ءباسپاسوز قىزمەتىنىڭ مالىمەتىنشە، باس-اياعى 17 ادام ۇيىمداسقان قىلمىستىق توپتىڭ قۇربانى بولعان. 4 ادامنان تۇراتىن توپ جابىرلەنۋشىلەرگە 2 ملن تەڭگەدەن استام شىعىن كەلتىرگەن.

«ولار ءوز قىزمەتىنە زاڭدىلىق بەرۋ ءۇشىن تۇتىنۋشىلاردىڭ قۇقىقتارىن قورعاۋ جانە سىبايلاس جەمقورلىققا قارسى كۇرەس تۇرىندە جالعان قوعامدىق ۇيىم اشقان. ارقايسىسىنا ناقتى رولدەر بەرىلگەن. سونىمەن قاتار جالعان كۋالىكتەر مەن ەسىمحاتتار جاساعان. ولار جابىرلەنۋشىلەرگە وزدەرىن بلوگەرلەر، جۋرناليستەر جانە زاڭگەرلەر رەتىندە تانىستىرىپ وتىرعان. قىلمىسكەرلەر بارلىق ارەكەتتەردى بەينەتاسپاعا ءتۇسىرىپ، الەۋمەتتىك جەلىلەردە بەينەجازبالاردى جاريالايمىز دەپ قورقىتىپ، ولاردان اقشا تالاپ ەتكەن»،- دەيدى تۇركىستان وبلىستىق پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ.

اتاپ ايتقاندا، ۇيىمداسقان قىلمىستىق توپ مۇشەلەرى 2019 جىلى ماقتاارال اۋدانىنداعى قۇرىلىس الاڭدارىنىڭ بىرىنە بارىپ، ونداعى اتقارىلىپ جاتقان جۇمىستار ناشار ساپامەن جانە ءتۇرلى زاڭبۇزۋشىلىقتارمەن جۇرگىزىلىپ جاتىر دەگەن سىلتاۋمەن قۇرىلىس فيرماسىنىڭ باسشىسىنان 500 مىڭ تەڭگە تالاپ ەتكەن.

ال، وتكەن جىلدىڭ كۇزىندە ەكولوگيانى قورعاۋ تۇرىمەن جەرگىلىكتى فيرمالاردىڭ ءبىرىنىڭ كەڭسەسىنە كەلىپ، ديرەكتوردان اي سايىن 100 مىڭ تەڭگە كولەمىندە تولەم تالاپ ەتكەن. جابىرلەنۋشى ءوز كەزەگىندە جەتىساي اپب-نە ارىزدانعان. جاسالعان قىلمىستاردىڭ اۋىرلىعى مەن بىرەگەيلىگىن ەسكەرە وتىرىپ، قىلمىستى اشۋعا جانە تەرگەۋگە وبلىستىق كريمينالدىق پوليتسيا قىزمەتكەرلەرى مەن تەرگەۋشىلەرى اۋداندىق پوليتسيا قىزمەتكەرلەرىنە كومەككە جىبەرىلگەن. سوتقا دەيىنگى تەرگەۋ اياسىندا جەتكىلىكتى دالەلدەر جيناقتالىپ، قىلمىسكەرلەر اقشا الۋ كەزىندە ۇستالدى.

«10 ايدىڭ ىشىندە وسى قىلمىستىق توپتىڭ ءار قاتىسۋشىسىنىڭ كىناسى تولىعىمەن دالەلدەندى. سونىمەن قاتار بۇل توپ ۇيىمداسقان سيپاتتا بوپسالاۋ مەن الاياقتىقتىڭ 17 جايتىنا قاتىستى بولىپ شىققان. قىلمىستىق توپتىڭ ۇيىمداستىرۋشىسى مەن مۇشەلەرى قر قك-ءنىڭ 262-بابىنىڭ 1-بولىگىندە «ۇيىمداسقان توپ، قىلمىستىق ۇيىم قۇرۋ جانە وعان باسشىلىق ەتۋ، سول سياقتى ولارعا قاتىسۋ«، 194-بابىندا «قورقىتىپ الۋشىلىق» جانە 190-بابىندا «الاياقتىق» كوزدەلگەن قىلمىستاردى جاساعانى ءۇشىن 10 جانە 8 جىلعا باس بوستاندىعىنان ايىرىلدى»،- دەلىنگەن حابارلامادا.

 

سوڭعى جاڭالىقتار