21 قىركۇيەك, 10:52 300 0 الەۋمەت انار لەپەسوۆا

جىل باسىنان بەرى كوپبالالى انالارعا 153,3 ملرد تەڭگە جاردەماقى تولەندى

2020 جىلعى قاڭتار-تامىز ارالىعىندا جالپى سوماسى 153,3 ملرد تەڭگەگە 390 مىڭ وتباسى كوپبالالى وتباسىلارعا ارنالعان مەملەكەتتىك جاردەماقىمەن قامتىلدى.

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنىڭ مالىمەتىنشە، تامىز ايىندا وسى جاردەماقى ءتۇرىن جالپى سوماسى 19,7 ملرد تەڭگەگە 394,1 مىڭ وتباسى العان.

اتالعان مەملەكەتتىك جاردەماقىعا 4 جانە ودان كوپ بىرگە تۇراتىن كامەلەتكە تولماعان نەمەسە كۇندىزگى بولىمدە وقيتىن 23 جاسقا دەيىنگى ستۋدەنت بالالارى بار وتباسىلار تابىسىنا قاراماستان ۇمىتكەر بولا الادى. تولەم مولشەرى بالالاردىڭ سانىنا بايلانىستى 44 532 تەڭگەدەن (4 بالا) 77 951 تەڭگەگە (7 بالا) دەيىن، 8 جانە ودان كەيىنگى ءار بالاعا 4 اەك-تەن سارالانعان.

وسىلايشا، جاردەماقىنىڭ ۇلعايۋى 8 جانە ودان دا كوپ بالاسى بار وتباسىلار ءۇشىن جەكە مولشەردى بەلگىلەۋ ارقىلى قامتاماسىز ەتىلدى. ءتيىستى زاڭعا مەملەكەت باسشىسى اعىمداعى جىلعى 13 مامىردا قول قويدى. 8 بالاسى بار وتباسى ءۇشىن جاردەماقى 88 896 تەڭگەنى قۇرايدى، 9 بالاعا – 100 008 تەڭگە، 10 – 111 120 تەڭگە، 11 - 122 232 تەڭگە، 12 – 133 344 تەڭگە، 13 – 144 456 تەڭگە، 14 – 155 568 تەڭگە، 15 - 166 680 تەڭگە، 16 – 177 792 تەڭگە تولەنەدى.

زاڭ 2020 جىلدىڭ 1 قاڭتارىنان باستاپ كۇشىنە ەندى، وسىعان بايلانىستى 8 جانە ودان كوپ بالاسى بار كوپبالالى وتباسىلارعا بەرىلەتىن جاردەماقى مولشەرى تاعايىندالعان كەزدەن باستاپ قايتا ەسەپتەلدى. سونىمەن، اعىمداعى جىلدىڭ شىلدە ايىندا اتالعان وتباسىلار جاڭا مولشەردە جاردەماقىنى، سونداي-اق قاڭتار-ماۋسىم ايلارىندا قالىپتاسقان ايىرمانى الدى.

جالپى، 2020 جىلى كوپبالالى وتباسىلارعا مەملەكەتتىك جاردەماقى تولەۋگە رەسپۋبليكالىق بيۋدجەتتەن 191,1 ملرد تەڭگە قاراستىرىلعان.

ەسكە سالا كەتەيىك، قازاقستانداعى كوپبالالى وتباسىلارعا ولاردىڭ كىرىستەرىن ەسەپكە الماي بەرىلەتىن جاڭا مەملەكەتتىك جاردەماقى، 2020 جىلدىڭ 1 قاڭتارىنان باستاپ اتاۋلى الەۋمەتتىك كومەك كورسەتۋدىڭ جاڭا تەتىكتەرىندە قاراستىرىلعان تابىسى از جانە كوپبالالى وتباسىلاردى قولداۋدىڭ ءۇش نەگىزگى باعىتى اياسىندا ەنگىزىلدى.

 

سوڭعى جاڭالىقتار