20 قىركۇيەك, 15:53 1016 0 دەنساۋلىق انار لەپەسوۆا

ددسۇ ەۋروپا ەلدەرىندە كوروناۆيرۋستىڭ ءورشۋ سەبەبىن ايتتى

بالقان ەلدەرىندە جانە بۇكىل ەۋروپا اۋماعىندا ەپيدەميولوگيالىق احۋالدىڭ ۋشىعۋىنا كوروناۆيرۋسقا قارسى ساقتىق شارالارىنىڭ ساقتالماۋى سەبەپ.  مەملەكەتتەردىڭ بيلىگى باقىلاۋدى كۇشەيتۋى قاجەت. بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ بەلگرادتاعى كەڭسەسى مالىمدەدى، دەپ جازادى ريا نوۆوستي.

البانيا، بوسنيا مەن گەرتسەگوۆينا، سلوۆەنيا، سولتۇستىك ماكەدونيا، حورۆاتيا، چەرنوگوريا جانە كوسوۆو رەسپۋبليكاسىنىڭ بيلىگى كارانتين شارالارى جەڭىلدەتىلىپ، شەكارالار اشىلعان سوڭ ىندەت جۇقتىرعاندار مەن ۆيرۋستان كوز جۇمعاندار سانىنىڭ كۇرت وسكەنىن ايتتى.

«بالقان ايماعىنداعى عانا ەمەس، بۇكىل ەۋروپا اۋماعىندا جاعداي قيىنداپ كەلەدى. بارلىق مەملەكەتتەر دەنساۋلىق ساقتاۋ شارالارىن دەر كەزىندە قولعا الىپ، جۇيەلى تۇردە ارەكەت ەتۋى قاجەت. ىندەت جۇقتىرعاندارمەن بايلانىستا بولعانداردى وقشاۋلاۋ، اراقاشىقتىق ساقتاۋ، ماسكا تاعۋ، تىنىس الۋ جولدارىنىڭ جانە قول گيگيەناسىن قاداعالاۋ سەكىلدى شارالار مىندەتتى تۇردە ورىندالۋى قاجەت»، - دەيدى ددسۇ وكىلدىگىندەگىلەر.

ۇيىم ماماندارىنىڭ سوزىنشە، دەمالىستا جۇرگەندەر، تۇنگى كلۋب، ءدىني نىساندارعا باراتىندار جانە وزگە دە بۇقارالىق شارالارعا قاتىسۋشىلاردىڭ ساقتىق شارالارىن ورىنداماۋى ىندەتتىڭ تارالۋىن قايتا ءورشىتتى.

سونداي-اق، اق حالاتتىلار مەكتەپتەردىڭ اشىلۋى دا ۇلكەن قاۋىپ تۋدىرىپ وتىرعانىن ايتادى. دەسە دە، ماماندار ءبىلىم بەرۋ ءىسىن تۇرالاتپاۋ ءۇشىن جانە بالالاردى الەۋمەتتەندىرىپ، تەڭسىزدىك ماسەلەسىن جويۋ ءۇشىن مەكتەپتەردى اشۋ ءماجبۇرلى قادام بولدى دەپ ەسەپتەيدى.

ايتا كەتەيىك، يسپانيادا كارانتين كۇشەيتىلدى. ىندەتتىڭ تارالۋىن توقتاتۋ ءۇشىن مادريد بيلىگى قالانىڭ بىرنەشە اۋدانىندا شەكتەۋ شارالارىن كۇشەيتۋگە ءماجبۇر بولدى. 850 مىڭ ادام تۇراتىن اۋدانداردى قامتيتىن شەكتەۋ 2 اپتاعا سوزىلادى. تۇرعىندار ۇيلەرىنەن تەك جۇمىسقا، مەكتەپكە نەمەسە دارىگەرگە قارالۋ ءۇشىن عانا شىعا الادى.

ال ۇلىبريتانيادا كارانتين تالاپتارىن بۇزعاندارعا سالىناتىن ايىپپۇل كولەمى كوبەيەدى.  كوروناۆيرۋس جۇقتىرعانى راستالعان جانە ەكى اپتالىق كارانتيندى بىرنەشە رەت بۇزعان ازاماتتار كەلەسى اپتادان باستاپ 10 مىڭ فۋنتقا دەيىن (13 مىڭ دوللارعا دەيىن) تولەمەك. ەلدەگى ىندەتتىڭ تارالۋىن باقىلاۋ ءۇشىن قۇرىلعان Test جانە trace باعدارلاماسى قىزمەتكەرلەرىنىڭ ۇسىنىستارىنا قۇلاق اسپايتىن تۇرعىندار دا وسىنشا كولەمدە ايىپپۇل ارقالايدى.

سوڭعى جاڭالىقتار